TLAPOUALISTLI 33

Opanokej itlajkotia ueyi atl Rojo

¡XIKITA tlen panotok! Ye nin Moisés akin kiajkoktok ikuauitl ipan ueyi atl Rojo. Akinmej kuali katej inauak ye, yejuan israelitas. Maski ijkon, Faraón uan isoldados meltsintokej itech ueyi atl. Ma tikitakan ken opanok nin.

Ken achto yotimomachtijkej, satepan opanok chauistli majtlaktli, Faraón okinmilui israelitas ma kisakan itech Egipto. Kanaj 600,000 tlakamej israelitas okiskej, noijki miakej siuamej uan konemej. Noijki miakej tlaltikpaktlakamej tlen otlaneltokakej itech Jehová okiskej iuan israelitas. Nochtin yejuan ijkuak okiskej itech Egipto okiuikayaj iyolkauan, ichkamej uan tentsomej.

Achto kisaskiaj, israelitas okintlajtlanilijkej egipcios tlakentli uan tlamantli tlen okichijchijkej ika oro uan plata. Egipcios sapanoa omomojtiayaj, ika tlen okinpano itech chauistli majtlaktli. Ik non, okinmakakej israelitas nochi tlen okintlajtlanilijkej.

Sekimej tonalmej satepan, israelitas oajsitoj itempa ueyi atl Rojo. Ompa omoseuijkej. Ijkuakon, Faraón uan itlakeualuan opejkej moyolkuepaj pampa okinkauilijkej israelitas ma kisakan. Okijtojkej: ‘¡Otikinkauilijkej totlakeualuan ma kisakan!’.

Ijkuakon, Faraón omokuayejyeko okse tlamantli kichiuas. San niman okiyektlali icarro tlen ika moteuia uan isoldados. Ijkuakon, okiski inkuitlapan israelitas uan okiuikaya 600 carros tlen ika tlateuiaj uan noijki miakej oksekimej carros tlen okipiaya Egipto.

Ijkuak israelitas okitakej oualayaj Faraón uan isoldados, omomojtijkej miak. Amo okipiayaj kanin choloskiaj. Inmixpan okatka ueyi atl Rojo, uan inkuitlapan oualayaj egipcios. Maski ijkon, Jehová okitlali se mixtli itlajkotia israelitas uan egipcios. Ik non, egipcios amo ueli okinmitakej israelitas pampa kinkitskiskej.

Axkan Jehová okilui Moisés ma kiajkokui ikuauitl ipan ueyi atl Rojo. Ijkuak Moisés ijkon okichi, Jehová okichi ma ejeka chikauak, se ejekatl tlen opeuaya kanin kisa Tonaltsin. Ijkuakon, ueyi atl omotlajkoxelo, uan atl omoka ken ome tepamitl.

Ijkuakon, israelitas opejkej nejnemij itech tlali uaki itlajkotia ueyi atl. Monekia miak kauitl pampa uelis panoskiaj millones tlaltikpaktlakamej uan inyolkauan. Saiktlami, egipcios oksepa ueli okinmitakej, uan okalakej itech ueyi atl pampa okinekiayaj kinkitskiskej israelitas.

Ijkuak ijkon okichijkej, toTajtsin Dios okichi ma ijtlakauikan incarros. Egipcios omomojtijkej miak uan opejkej kijtoaj chikauak: ‘Jehová kinpaleuia israelitas. ¡Ma timokuepakan!’. Maski ijkon, ayakmo ueli ocholojkej.

Ijkuakon, Jehová okilui Moisés ma kajkoui ikuauitl ipan ueyi atl Rojo, ken otikitak itech tlaixkopinal. Uan ijkuak Moisés ijkon okichi, toTajtsin Dios okiualkajka atl uan ompa omeltsinkej egipcios. Nochtin soldados okatkaj ijtik ueyi atl. ¡Nion se egipcio omomakixti!

¡Omoyolpakti miak ialtepetl toTajtsin Dios pampa omomakixtijkej! Tlakamej okitlasojkamatilijkej Jehová ika se tlakuikali uan okijtojkej: ‘Jehová otetlanki. Yokinmeltsinki itech ueyi atl caballos uan akinmej okinuikayaj’. Míriam, ikni Moisés, okikixti ipandereta, uan nochtin siuamej noijki ijkon okichijkej. Uan omijtotijkej uan noijki otlakuikakej: ‘Jehová otetlanki. Yokinmeltsinki itech ueyi atl caballos uan akinmej okinuikayaj’.

Éxodo 12 a 15.