Indaba 33: Ukuyama Ilwandle Elibomvu
QALA bonyana kwenzekani! Lo, nguMosisi ululela intongakhe eLwandle eliBomvu. Laba abasehlangothini lakhe abavikelekileko, ma-Israyeli. Kodwana uFaro nebutho lakhe baqwila elwandle. Akhe sibone bonyana lokhu kwenzeka bunjani.
Njengombana sifundile, uFaro wavumela ama-Israyeli bona akhambe eGibhide ngemva kwesibetho sesi-10 kumaGibhide. Kwakhamba amadoda wama-Israyeli angaba yi-600 000 kuhlanganisa abafazi nabantwana. Nenengi labantu abangasiwo ama-Israyeli kodwana ababa bakhulekeli bakaJehova bakhamba nabo. Boke bathatha izimvu zabo, iimbuzi neenkomo.
Ngaphambi kobanyana bakhambe, ama-Israyeli abawa abantu beGibhide izambatho nezinto ezenziwe ngegolide nangesiliva. AmaGibhide gade asaba khulu ngebanga lesibetho samaswaphela esabehlelako. Ngalokho banikela ama-Israyeli yoke into abayibawako.
Ngemva kwamalangana ama-Israyeli afika eLwandle eliBomvu lapho aphumula khona. Ngesikhatheso uFaro nabantu bakhe bathoma ukuzisola ngokuvumela ama-Israyeli akhambe. Bathi: ‘Silise iingqila zethu zakhamba!’
UFaro watjhintjha umkhumbulo wakhe godu. Msinyana walungisa iinkoloyi zakhe zepi nebutho lakhe. Wathoma ukugijimisa ama-Israyeli ngeenkoloyi zepi ezikhethekileko eziyi-600, kuhlanganise nezinye iinkoloyi zepi zeGibhide.
Ama-Israyeli athukwa khulu nekabona uFaro nebutho lakhe babalandela. Gade banganayo indlela yokubaleka, ngakwelinye ihlangothi labo, gade kuneLwandle eliBomvu kanti amaGibhide eza ngakwelinye ihlangothi. Kodwana uJehova wenza kwaba nelifu phakathi kwabantu bakhe namaGibhide. Ngalokho amaGibhide khenge akwazi ukubona ama-Israyeli bonyana awasahlele.
Ngemva kwalokho uJehova watjela uMosisi bonyana alulele intongakhe eLwandle eliBomvu. Uthe angakwenza lokho, uJehova wabangela umoya onamandla ovela epumalanga. Amanzi welwandle ahlukana avimbeka ngapha nangapha.
Ama-Israyeli athoma akhamba elwandle elomileko. Kwathatha ama-iri amanengi bona iingidi zabantu neenlwana zidlule ngokutjhaphulukileko elwandle elinganalitho. Kodwana emaswapheleni amaGibhide abona ama-Israyeli godu. Nanziya iingqila zabo sele zikhamba kude khulu! Ngalokho amaGibhide angena ngelwandle elomileko azigijimisa.
Kuthe nakenza lokho, uZimu wabangela amavili weenkoloyi zawo aphuma. AmaGibhide afikelwa ukwesaba okukhulu athoma nokulila athi: ‘UJehova ulwela ama-Israyeli. Asiphumeni la!’ Kodwana besele atjhiywe sikhathi.
Kulapho-ke uJehova atjela uMosisi bona alulele intongakhe eLwandle eliBomvu, njengombana ubonile esithombeni. Kuthe uMosisi angakwenza lokho, amaboda wamanzi abuya agubuzesa amaGibhide neenkoloyi zawo zepi. Amabutho woke gade alandela ama-Israyeli phakathi nelwandle, begodu akekho noyedwa owaphuma aphila kumaGibhide!
Bathaba kangangani abantu bakaZimu abasindako! Abantu bavuma ingoma yokuthokoza uJehova bathi: ‘UJehova uthumbile! Uphose iimpera nabakhweli bazo elwandle.’ Udadwabo lakaMosisi uMiriyamu wakhipha isigubhe sakhe sombhino, boke abafazi bamlandela ngezabo. Njengombana badansa bathabile, bavuma ingoma efana naleyo ebeyivunywa madoda ethi: ‘UJehova uthumbile. Uphose iimpera nabakhweli bazo elwandle.’
Eksodosi izahluko 12 ukuya ku-15.
Iimbuzo
- Mangaki amadoda, abafazi nabantwana bakwa-Israyeli, abatjhiya iGibhide begodu ngubani owakhamba nabo?
- UFaro wazizwa njani ngemva kokuvumela ama-Israyeli bona akhambe, begodu wenzani?
- Khuyini uJehova akwenza ukuvimbela amaGibhide ekusahleleni abantu bakhe?
- Kwenzekani lokha uMosisi nekalula intongakhe phezu kweLwandle eliBomvu, begodu ama-Israyeli enzani?
- Kwenzekani lokha amaGibhide nakagijimisa ama-Israyeli elwandle?
- Ama-Israyeli atjengisa njani bona bekathabile begodu ayamthokoza uJehova ngombana uwasindisile?
Iimbuzo engezelelekileko
- Funda u-Eksodosi 12:33-36.
Khuyini uJehova ayenza ukuqinisekisa bona abantu bakhe bayabhadalwa ngebanga layo yoke iimnyaka basekugandelelweni eGibhide? (Eks. 15:1, 2; AmaRh. 105:2, 3; ISamb. 15:3, 4)
- Funda u-Eksodosi 14:1-31.
Amezwi kaMosisi atlolwe ku-Eksodosi 14:13, 14 awathinta njani iinceku zakaJehova namhlanjesi njengombana ziqalene nokuza kwepi ye-Amagedoni? (2 Imila. 20:17; AmaRh. 91:8)
- Funda u-Eksodosi 15:1-8, 20, 21.
Kubayini iinkhonzi zakaJehova kufanele zimdumise ngombhino? (Eks. 15:1, 2; AmaRh. 105:2, 3; ISamb. 15:3, 4)
Ngisiphi isibonelo sokudumisa uJehova uMeriyamu nabanye abafazi eLwandle eliBomvu abasibekela abafazi bamaKrestu namhlanjesi? (Eks. 15:20, 21; AmaRh. 68:11)
