Ekitebyo 33

Okwambuka Enyanja Erikutukura

REEBA ekirikubaho hati! Ogwo ogoroire omukono n’enkoni ahaiguru y’Enyanja Erikutukura ni Musa. Abo abari nawe aha nkungu n’Abaisraeli. Kwonka Faraho n’eihe rye ryona barikurohama omu nyanja. Ka tureebe oku eki kyabaireho.

Nk’oku twegire, Faraho akagambira Abaisraeli kugyenda kuruga omuri Misri bwanyima ya Ruhanga okureeta ekibonaboneso kya 10 aha Bamisri. Abashaija b’Abaisraeli nka 600,000, hamwe n’abakazi n’abaana bakagyenda. Kandi, omuhendo muhango gw’abantu abandi, abaahindukire, abaikiririize omuri Yehova, bakagyenda n’Abaisraeli. Boona bakagyenda n’entaama, n’embuzi hamwe n’ente zaabo.

Batakagyenzire, Abaisraeli bakashaba Abanyamisri ebijwaro hamwe n’ebintu ebikozirwe omu zaabu n’efeeza. Abanyamisri bakaba batiinire munonga, ahabw’ekibonaboneso ekyahererukire kubahikaho. N’ahabw’ekyo bakaheereza Abaisraeli buri kintu kyona eki baabashabire.

Bwanyima y’ebiro bikye, Abaisraeli bakahika aha Nyanja Erikutukura. Aho baruhuuka. Obwo kunu, Faraho n’abashaija be bakatandika kwefuuza ahabw’okurekura Abaisraeli kugyenda. ‘Twareka abahuuku baitu baagyenda!’ Batyo nikwo baagizire.

Atyo Faraho yaahindura ekiteekateeko kye ogundi murundi. Ahonaaho yaakwata ekigaari kye ky’orugamba n’amahe ge gayeteekateeka. Batyo baatandika kukuratira Abaisraeli baine ebigaari 600 eby’omutaano n’ebindi bigaari by’orugamba ebya Misri.

Abaisraeli ku baareebire Faraho n’amahe ge babakuratiire, baatiina munonga. Hakaba hatariho omuringo gwona ogw’okuhungamu. Enyanja Erikutukura ekaba ebari omu maisho, kwonka Abanyamisri bakaba nibabaizira kuruga aha rubaju orundi. Kwonka Yehova yaata ekicu ahagati y’abantu be n’Abanyamisri. N’ahabw’ekyo Abanyamisri bakaba batarikubaasa kureeba Abaisraeli kubaasa kubazinda.

Yehova nikwo kugambira Musa okugorora omukono gwe n’enkoni ye ahaiguru y’Enyanja Erikutukura. Ku yaakikozire, Yehova yaareeta omuyaga gw’amaani kuruga burugwa-izooba. Amaizi gaatandika kwebaganisamu, gaacungirwa embaju zombi.

Reero Abaisraeli baatandika kuraba omu nyanja aha itaka ryomire. Kikatwara eshaaha nyingiho obukaikuru n’obukaikuru bw’abantu n’amatungo gaabo goona kuraba gye omu nyanja kuhika seeri. Aha muheru Abanyamisri baabaasa kushuba kureeba Abaisraeli. Abahuuku baabo bakaba nibarengarenga! Nikwo kwehuuta bakaza omu nyanja babakuratiire.

Ku baahikiremu, Ruhanga yaashayisa enziga z’ebigaari byabo. Abanyamisri baatiina munonga kandi baatandika kugamba omu iraka rihango nibagira bati: ‘Yehova niwe arikurwanirira Abaisraeli. Murekye turugye aha!’ Kwonka kikaba kitakibaasika.

Obwo nibwo Yehova yaagambiire Musa okugororera enkoni ye ahaiguru y’Enyanja Erikutukura nk’oku waareeba omu kishushani. Kandi Musa ku yaakikozire, ebisiika by’amaizi byashandaara byashweka Abanyamisri n’ebigaari byabo. Eihe ryona rikaba rikuratiire Abaisraeli omu nyanja. Kandi tihaine n’omwe aha Bamisri owaagumire ahuriire!

Abantu ba Ruhanga boona ka baashemereirwe ahabw’okujunwa! Abashaija bakeshongora ekyeshongoro ky’okuhimbisa Yehova barikugira ngu: ‘Yehova asingwiire orugamba rw’ekitiinisa. Embaraasi n’abazitembire abinagire omu nyanja.’ Munyaanya wa Musa Miriamu yaakwata ekitaasa, n’abandi bakazi boona baamukuratira n’ebitaasa byabo. Baayemurika n’okushemererwa baayeshongora ekyeshongoro nikyo kimwe n’eki abashaija baabaire nibeeshongora; ‘Yehova asingwiire orugamba rw’ekitiinisa. Embaraasi n’abazitembireho abinagire omu nyanja.’

Okuruga eshuura 12 okuhika 15.