NEA mɔɔ ɛlɛsi la! Mosisi a lɛ kpɔma ne mɔɔ yedende ye Nyevile Kɔkɔlɛ ne azo la. Menli mɔɔ boka ɔ nwo mɔɔ ɛpɛ nyevile ne ɛwie la le Yizilayɛma. Noko nyevile ne ɛlɛfa Falo ne ye ɛlɔnema ne amuala. Maa yɛnlea kɛ ɛhye zile rale la.

Kɛmɔ yɛzukoa ye dɛba la, Falo manle Yizilayɛma ne adenle kɛ bɛvi Yigyibiti bɛhɔ wɔ mekɛ mɔɔ Nyamenle manle ngyegyelɛ ne mɔɔ tɔ zolɛ 10 la rale Yigyibitima anwo zo la anzi. Yizilayɛ mrenya mɔɔ bayɛ 600,000, yɛɛ akee mraalɛ nee ngakula dɔɔnwo a vile ɛkɛ hɔle a. Eza menli gyɛne dɔɔnwo, mɔɔ raliele Gyihova lile la, nee Yizilayɛma ne hɔle. Bɛ muala bɛvale bɛ mboane nee bɛ mbɔnkye yɛɛ bɛ nlankɛ bɛhɔle.

Kolaa na bɛahɔ la, Yizilayɛma ne bizale Yigyibitima liele ndanlɛ nee ninyɛne mɔɔ bɛva ezukoa kɔkɔlɛ nee ezukoa fufule bɛyɛ la wɔ bɛ ɛkɛ. Ɔlua ngyegyelɛ ne mɔɔ li awieleɛ mɔɔ rale Yigyibitima anwo zo la ati, bɛ ahonle dule. Yemɔti bɛvale debie biala mɔɔ Yizilayɛma ne bizale ye bɛ ɛkɛ ne la bɛmanle bɛ.

Mekɛ ekyi guale nu la Yizilayɛma ne radwule Nyevile Kɔkɔlɛ ne anloa. Bɛliele bɛ ɛnwomenle wɔ ɛkɛ. Wɔ mekɛ ɛhye anu, ɛnee Falo nee ye menli ne noko ɛnlu bɛ nwo kɛ bɛmaa Yizilayɛma ne ɛhɔ la. Bɛhanle kɛ: ‘Yɛmaa yɛ ngɛkɛlɛ ne mɔ ɛhɔ!’

Ɔti Falo eza hakyile ye adwenle bieko. Ɔzieziele ye konle ehwili ne nee ye ɛlɔnema ne ndɛndɛ. Na akee ɔvale konle ehwili mɔɔ bɛyɛ ye ngakyile la 600, yɛɛ Yigyibiti konle ehwili ne mɔ amuala na ɔdoale Yizilayɛma ne.

Mɔɔ Yizilayɛma ne nwunle kɛ Falo nee ye ɛlɔnema ne ɛlɛba bɛ nwo zo la, ɛzulolɛ hanle bɛ. Ɛnee adenle biala ɛnle ɛkɛ mɔɔ bɛkola bɛfa zo bɛnriandi a. Ɛnee Nyevile Kɔkɔlɛ ne la bɛ nyunlu, yɛɛ bɛto bɛ nye bɛ nzi a Yigyibitima a ɛpuke ɛkɛ mɔɔ ɛlɛba la. Noko Gyihova vale amungu pɛle ye menli ne nee Yigyibitima avinli. Yemɔti Yigyibitima ne annwu Yizilayɛma na bɛaholo bɛ nwo zo.

Akee Gyihova hanle hilele Mosisi kɛ ɔdende ye kpɔma ne wɔ Nyevile Kɔkɔlɛ ne azo. Mɔɔ ɔyɛle la, Gyihova manle aduduleɛ anwoma anu ɛsesebɛ bie bɔle. Nyevile ne anu hyɛle nwiɔ, na nzule mɔɔ wɔ nyevile ne anu la dwazole bolonwonwo wɔ foa ko nee foa ko.

Na Yizilayɛma luale nyevile ne anu azɛlɛ resee ne azo. Dɔnehwele dɔɔnwo pɛle nu na menli mgbe mgbe ne nee bɛ nyɛmoa ne mɔ amuala ava bɛ nwo kɔlɔɔnwo apɛ nyevile ne ahɔ ɔ nzi. Awieleɛ kolaa ne Yigyibitima ne nwunle Yizilayɛma ne bieko. Bɛ ngɛkɛlɛ ne mɔ ɛlɛkɔ! Yemɔti bɛluale nyevile ne anu bɛdinle bɛ.

Mɔɔ bɛluale nuhua bie la, Nyamenle manle bɛ konle ehwili ne mɔ agyakɛ miminle. Ɛzulolɛ kpole hanle Yigyibitima ne na bɛhanle kɛ: ‘Gyihova ɛlɛko atia yɛ amaa Yizilayɛma. Bɛmaa yɛnriandi yɛvi ɛke!’ Noko ɛnee yeha amozi somaa.

Mekɛ ko ne ala anu a Gyihova hanle hilele Mosisi kɛ ɔdende ye kpɔma ne wɔ Nyevile Kɔkɔlɛ ne anu, kɛmɔ ɛnwu ye nvoninli ne anu la. Na mekɛ mɔɔ Mosisi yɛle la, nyevile ne mɔɔ ɛyɛ kɛ bane la yile bɔle nu na ɔhedale Yigyibitima nee bɛ konle ehwili ne mɔ anwo zo. Ɛlɔnema ne kɔsɔɔti doale Yizilayɛma ne wɔ nyevile ne anu. Na Yigyibitima ne anu ko bɔbɔ anga!

Nea kɛ Nyamenle menli ne amuala anye zile liele kɛ bɛliele bɛ ngoane a! Mrenya ne mɔ dole ayɛlɛyelɛ edwɛne manle Gyihova, kɛ: ‘Gyihova ɛli konim anyunlunyia nu. Yevuandi mgbɔnwɔ nee bɛ kavolɛ ne mɔ yegua nyevile ne anu.’ Mosisi adiema raalɛ Meleam vale ye akɛya, na mraalɛ ne mɔ kɔsɔɔti vale bɛ akɛya doale ye. Na mɔɔ bɛlɛfa anyelielɛ bɛazi agole la, bɛdole edwɛne ko ne ala mɔɔ ɛnee mrenya ne mɔ ɛlɛto la bie kɛ: ‘Gyihova ɛli konim anyunlunyia nu. Yevuandi mgbɔnwɔ nee bɛ kavolɛ ne mɔ yegua nyevile ne anu.’