¡CHAWILAMPEʼ wariʼ! Are ri Moisés uyikon rucheʼ puwiʼ ri nimalaj jaʼ ubʼiʼ mar Rojo. Wanikʼaj winaq e takʼal chuchiʼ jaʼ xa täq israelitas. Tekʼuriʼ ri Faraón rukʼ ronojel täq ajchʼoj aj Egipto e kʼo rukʼ tijan kejiqʼik (kejeʼek). Chqilampeʼ suche xbʼantaj wariʼ.

Chiʼ xkʼis ri kʼisbʼäl kʼäx puwiʼ ri Egipto, ri Faraón xuya bʼi chike ri israelitas xebʼek. E 600.000 achijabʼ täq israelitas xebʼek, xuqujeʼ e kʼo e kʼi täq ixoqibʼ, akʼalabʼ. Xuqujeʼ e kʼi nikʼaj chik täq winaq che xekojon che Jehová xebʼe kukʼ ri israelitas. Ronojel xkekʼam bʼi ri täq kichikop (awaj) chiʼ xeʼel bʼi chupam Egipto.

Chiʼ xebʼek, ri täq israelitas xketa bʼi atzʼyaq, saq pwäq xuqujeʼ nikʼaj chik chike ri egipcios. Ri täq egipcios kkexibʼin kibʼ rumal ri kʼisbʼäl kʼäx che xpe chikij. Rumal wariʼ, ronojel chike täq xketa chike xkeya bʼi chike ri täq israelitas.

Kebʼ oxibʼ qʼij chik, ri israelitas xeʼopan chuchiʼ ri nimalaj jaʼ. Chilaʼ xeʼuxlan wi (xiʼuxin wi). Tekʼuriʼ ri Faraón xuqujeʼ ronojel täq utaqoʼn, xpe kiwal rumal che xkeya bʼi chike ri israelitas xebʼek. ‹¡Suche xqaya chike täq qamos xebʼek!›, xechaʼ.

Ri Faraón xpe jun nimalaj riwal. Tekʼuriʼ xeʼumol bʼi ronojel täq ucarros rech chʼoj xuqujeʼ xeʼumol bʼi ronojel täq achijabʼ rech kebʼe pa chʼoj. Xebʼe chikij ri israelitas rukʼ 600 nimalaj täq carros, xuqujeʼ xeʼukʼam bʼi ronojel ri nikʼaj chik täq carros e kʼo Egipto.

 Chiʼ ri israelitas xkilo che ri Faraón petinäq rukʼ täq ajchʼoj, sibʼalaj xeʼok il. Kʼot pa kebʼe wi. Che kiwäch kʼo ri nimalaj jaʼ tekʼuriʼ chikij e petinäq ri aj Egipto. Tekʼuriʼ ri Jehová xukoj jun sutzʼ pa nikʼaj chike ri israelitas kukʼ ri aj Egipto. Rumal waʼ ri egipcios xekun täj xkil ri täq israelitas rech kebʼe che kikamsaxik.

Jehová xubʼij che Moisés che chuyika rucheʼ puwiʼ ri nimalaj jaʼ. Chiʼ Moisés xubʼan wariʼ, Jehová xubʼano che xpe jun nimalaj kaqiqʼ o jun nimalaj tew. Rukʼ wariʼ, ri nimalaj jaʼ xjaqtaj upam, xujach ribʼ pa nikʼaj.

Tekʼuriʼ ri täq israelitas xebʼin chupam ri nimalaj jaʼ, chuwäch chaqiʼj ulew. Naj xkebʼan bʼik rech xeqʼax bʼi che jun chik uchiʼ ri nimalaj jaʼ. Ri täq egipcios xekun chik xkekil ri täq israelitas, rumal waʼ xeʼok che kitarnexik (o kitarbʼexik) chupam ri bʼe kʼo pa nikʼaj che ri jaʼ.

Chiʼ e tran bʼi chikij ri israelitas, ri Ajawaxel xubʼano che xeʼel ri täq urueda ri täq kicarros. Ri egipcios sibʼalaj xkexibʼij kibʼ, rumal wariʼ xkebʼij: ‹Jehová tijan keʼutoʼ ri israelitas xuqujeʼ tijan kubʼan chʼoj chaqe. ¡Chojel bʼi waral!› Tekʼuriʼ xekun ta chik.

Chawilampeʼ ri wachbʼäl, ri Jehová xubʼij che Moisés che kuyik rucheʼ puwiʼ ri nimalaj jaʼ. Tekʼuriʼ ri jaʼ xtzaq lo chikij ri egipcios, rumal wariʼ ronojel täq kicarros xekanaj chuxeʼ jaʼ. Ronojel täq ajchʼoj egipcios e oknaq pa nikʼaj che ri nimalaj jaʼ. ¡Konojel xekamik!

¡Sibʼalaj xekikot ronojel täq israelitas rumal che xekʼaseʼ kan rumal ri Ajawaxel! Ronojel täq achijabʼ xebʼixon che Jehová rech kkemaltyoxij che, jewaʼ xkebʼij: ‹Jehová xchʼakanik. Xeʼuya kan ri täq kej xuqujeʼ ri täq ajchʼoj chuxeʼ ri jaʼ›. Míriam, ri ranabʼ ri Moisés, xresaj lo jun pandereta xuqujeʼ jewaʼ xkebʼan ri nikʼaj chik täq ixoqibʼ. Xexajowik xuqujeʼ xebʼixonik, jewaʼ xkebʼij: ‹Jehová xchʼakanik. Xeʼuya kan ri täq kej xuqujeʼ ri täq ajchʼoj chuxeʼ ri jaʼ›.