BUKA naku lokwentekako. Mosi welulela indvuku yakhe etikweLwandle loluBovu. Laba labeme naye ngema-Israyeli, kodvwa laba labamitako nguFaro nemabutfo akhe. Ase sibone kutsi kwenteka kanjani loku.

Njengoba sifundzile, Faro watjela ema-Israyeli kutsi ahambe ngemuva kwekutsi Nkulunkulu aletse tishayo letingu-10 eGibhithe. Kwakungemadvodza lacishe abengu-600 000 lahamba, kanye nebafati nebantfwana labanyenti. Kwahamba ngisho nebantfu labanyenti labebangesiwo ema-Israyeli, kodvwa lababese bayakholwa kuJehova. Bahamba nemihlambi yabo yetimvu, yetimbuti kanye neyetinkhomo.

Angakahambi, ema-Israyeli acela kutsi emaGibhithe abaphe kwekwembatsa kanye nalokwentiwe ngegolide nangesiliva. EmaGibhithe abetfuswe kakhulu ngulesishayo sekugcina lebesiwehlele, ngako abapha konkhe labakucela kuwo.

Ngemuva kwemalanga lambalwa, ema-Israyeli efika eLwandle loluBovu. Kulapho aphumula khona. Kusesenjalo, Faro netindvuna takhe batisola ngekutsi bawavumele ema-Israyeli ahamba. Ngako batsi: ‘Sesiyekele tigcili tetfu tahamba!’

Faro waphindze washintja umcondvo, masinyane walungisa incola yakhe yemphi kanye nelibutfo lakhe. Walungisa tincola temphi telikhetselo letingu-600 nato tonkhe letinye tincola taseGibhithe, walandzela ema-Israyeli.

Kwatsi ema-Israyeli nakabona Faro nelibutfo lakhe liwalandzela, efikelwa kwesaba lokukhulu. Besekute lapho angabalekela khona, ngoba embikwawo bewavinjwe Lwandle loluBovu, kantsi ngemuva kwawo kwakuta libutfo laseGibhithe. Jehova wenta kwaba nelifu emkhatsini kwebantfu bakhe nemaGibhithe. Loko kwenta kutsi baseGibhithe bangakhoni kuhlasela ema-Israyeli.

Jehova watjela Mosi kutsi alulele indvuku yakhe etikweLwandle loluBovu. Watsi nakelula sandla sakhe, Jehova wabangela umoya wasemphumalanga kutsi uhhushe. Emanti ehlukana ekhatsi ema ngala nangala.

Ema-Israyeli acala ewela lwandle ahamba emhlabatsini lowomile. Kwatsatsa sikhatsi lesidze kutsi bantfu labatigidzi netilwane tabo bawelele ngesheya kwelwandle baphephile. Sebewelile, emaGibhithe aphindze ababona futsi. Tigcili tawo tase tiphunyukile. Nabo babese bangena elwandle, batilandzela.

Nkulunkulu wenta kutsi emasondvo etincola tawo temphi akhumuke. EmaGibhithe efikelwa kwesaba lokukhulu, akhala atsi: ‘Asibalekeni sisuke-la, ngoba Jehova uyawalwela ema-Israyeli!’ Kodvwa kwase kwephutile.

Kungaleso sikhatsi-ke lapho Jehova atsi kuMosi akelulele indvuku yakhe etikweLwandle loluBovu, njengoba umbonile esitfombeni. Kwatsi Mosi nakaselula, emanti abuyela endzaweni yawo awakhukhula onkhe emaGibhithe netincola tawo. Lonkhe libutfo lelalandzela ema-Israyeli ngesikhatsi ayowela lwandle, kute namunye lowasindza.

Bajabula kakhulu bantfu baNkulunkulu ngekusindziswa kwabo. Emadvodza ahlabelela ingoma yekubonga Jehova, atsi: ‘Jehova uphakanyiswe kakhulu, lihhashi nemgibeli walo ukujikijele elwandle.’ Sisi waMosi Miriyamu watsatsa tigubhu takhe watishaya, bonkhe labanye labasikati nabo baphuma bamlandzela bashaya tabo tigubhu. Bagidza ngenjabulo bahlabela ingoma lefanana nalebeyihlatjelwa ngulamadvodza, batsi: ‘Jehova uphakanyiswe kakhulu, lihhashi nemgibeli walo ukujikijele elwandle.’