33-нҗи хекая

Гызыл деңзинден гечйәрлер

БУ БОЛЯН затлара серет! Муса хасасыны Гызыл деңзе узадяр. Онуң янында, ягны ховпсуз ерде ысрайыллылар дур. Фараон болса гошуны билен деңизде гарк болуп баряр. Гел, мунуң нәдип боланыны билели.

Билшимиз ялы, Худайың берен онунҗы җезасындан соң, фараон ысрайыллылара Мүсүрден чыкмагы буюрды. Җеми ысрайыллылардан 600 мүңе голай эркек адам, энчеме аяллар хем чагалар чыкды. Ысрайыллылар билен билеликде Ехова иман эден башга-да көп адамлар чыкды. Оларың хер бири яны билен гечи, гоюн хем сыгырларыны алып чыкдылар.

Ысрайыллылар гитмезинден өң, мүсүрлилерден эгин-эшик, гызылдыр күмүшден ясалан затлары сорап алдылар. Мүсүрлилер болса, иң соңкы җезадан гаты горкупдылар. Шонуң үчин олар ысрайыллыларың соран әхли затларыны бердилер.

Бирнәче гүнден соң, ысрайыллылар Гызыл деңзиң кенарында дүшледилер. Фараон ве онуң хызматкәрлери болса, ысрайыллылары гойберенине өкүнип: «Биз гулларымызы гойбердик!» дийип, улы гыкылык туруздылар.

Шонуң үчин фараон карарыны ене-де үйтгетди. Ол харбы арабаларыны ве гошуныны тиз йыгнап, ысрайыллыларың ызындан ковды. Оларың арасында 600 саны йөрите тайярланан араба барды.

Ысрайыллылар фараоның етип гелйән гошуныны гөренде гаты горкдулар. Гачмага ер ёкды. Бир тарапда Гызыл деңзи, бейлеки тарапдан болса мүсүрлилер етип гелйәрди. Эмма, ине, Ехова өз халкының ве мүсүрлилериң арасыны булут билен бүреди. Мүсүрлилере ысрайыллылар гөрүнмән соң, хүҗүм эдип билмедилер.

Соңра Ехова Муса хасасыны Гызыл деңзе узатмагы буюрды. Муса шейле хем этди. Шонда Ехова гүндогардан гүйчли ел өвүсдирди. Деңзиң сувы икә бөлүнди.

Шонда ысрайыллылар деңзиң ичи билен гуры ерден гечип башладылар. Миллионларча адамлар маллары билен деңзиң бейлеки тарапына гечйәнчәлер, бирнәче сагат герек болды. Ахыры мүсүрлилер ысрайыллылары ене-де гөрдүлер. Оларың гуллары гачып барярды. Шонуң үчин олар ысрайыллыларың ызы билен деңзе окдурылдылар.

Мүсүрлилер деңзе гиренде, Худай оларың арабаларының тигирлери дөвлер ялы этди. Мүсүрлилер гаты горкуп: «Ехова бизе гаршы гөрешйәр. Йөрүң, бу ерден чыкалың!» дийшип гыгырып башладылар. Йөне инди гичди.

Бу суратда Ехованың Муса хасасыны деңзе узатмагы буйруп дуран пурсаты гөркезилен. Дивар ялы болуп дуран сув ызына гайдып, арабалары билен билеликде мүсүрлилериң үстүни өртди. Ысрайыллыларың ызындан мүсүрлилериң бүтин гошуны окдурылыпды. Шонуң үчин мүсүрлилерден хич бириси-де дири галмады!

Худайың халкы гутуланына нәхили бегенйәрди! «Ехова шөхратлы еңиш газанды. Атлары ве атлылары деңзе зыңды» дийип, эркек адамлар миннетдарлык билен Ехова айдым айдярдылар. Мусаның аял доганы Меръем ве башга аяллар депрек билен чыкдылар. «Ехова шөхратлы еңиш газанды. Атлары ве атлылары деңзе зыңды» дийип, олар хем эркек адамларың айдян айдымыны танс эдип шатлык билен айдярдылар.

Чыкыш 12—15-нҗи баплар.