Makani 33: Kuzabuka Lwizi Lusalala
LANGA cicitika! Ooyu ngu Musa uutandabika nkoli a Lwizi Lusalala. Aabo mbocili limwi mbana Isilayeli bali kutala lyamulonga. Pele Falawo abasikalumamba bakwe boonse baanywida meenda mulwizi. Atubone eeci mbocakatalika.
Kweelana ambotwaiya, Falawo wakaambila bana Isilayeli kuunka Leza naakaleta cipenzyo ca 10 kubana Ijipiti. Basankwa bana Isilayeli ibasika kuma 600,000 bakaunka kubikkilizya abamakaintu banji alimwi abana. Alimwi abantu bamwi banji bakasyoma muli Jehova bakaunka limwi abana Isilayeli. Boonse bakatoleezya ambelele zyabo, mpongo aŋombe.
Kabatanaunka, bana Isilayeli bakalomba zisani kubana Ijipiti azintu zyangolida azyansiliva. Bana Ijipiti bakali yoowede kapati akaambo kacipenzyo camamanino cakabacitikila. Aboobo bakabapa bana Isilayeli kufwumbwa ncobakalomba.
Kwiinde mazuba maniini, bana Isilayeli bakasika ku Lwizi Lusalala. Okuya bakapumuna. Aciindi aawa Falawo abantu bakwe bakatalika kwaamba kuti anu nitwatakabaleka buyo bana Isilayeli. Bakati: ‘Twakaleka bazike besu baunka!’
Aboobo Falawo wakacinca maano alimwi. Cakufwambaana wakabweza nkalaki zyankondo abasikalumamba bakwe. Kumane wakatalika kubatandila bana Isilayeli ankalaki zyakwe ziyumu zili 600 kubikkilizya azimwi nkalaki zyoonse zyabana Ijipiti.
Bana Isilayeli nibakabona Falawo abasikalumamba bakwe kababatandila, bakayoowa kapati. Taku nkobakali kukonzya kuccijila. Lwizi Lusalala lwakali kumpela lyabo, abalo bana Ijipiti bakali kuboola musyule. Pele Jehova wakabikka cikumbi akati kabantu bakwe abana Ijipiti. Aboobo bana Ijipiti tiibakali kukonzya kubabona bana Isilayeli kuti babalwane.
Amane Jehova wakaambila Musa kutandabika nkoli yakwe a Lwizi Lusalala. Naakacita oobo, Jehova wakaleta muwo kuzwa kujwe wakaunga kapati. Meenda aalwizi akaandaana alimwi akaima ooku akooku.
Bana Isilayeli bakatalika kweenda akati kalwizi anyika njumu. Cakatola ciindi cilamfwu kutegwa tuulunzuma twabantu azivwubwa zyabo zyoonse bazabuke lwizi. Aciindi aawa, bana Ijipiti bakali kukonzya kubabona alimwi bana Isilayeli. Bazike babo bakasakana! Aboobo bakanjila mulwizi kababatandila.
Nibakanjila mulwizi, Leza wakapa kuti mavwili aankalaki zyabo atalike kufwumauka. Bana Ijipiti bakayoowa kapati akutalika kulila kabati: ‘Jehova nguuli kumpela kulwanina bana Isilayeli ikulwana ndiswe. Twamana nobantu!’ Pele kwakaba kumuka.
Eeci nceciindi Jehova ncaakaambila Musa kutandabika nkoli a Lwizi Lusalala mbuli mbobona acifwanikiso eeci. Musa mbwaakatandabikila buyo, meenda akatalika kweenda akubavwumbilila bana Ijipiti boonse ankalaki zyabo. Nkamu yoonse yabasikalumamba yakabaccilila bana Isilayeli mulwizi, taku naba omwe muna Ijipiti wakafwutuka!
Elo nkukkomana boonse bantu ba Leza nibakafwutulwa! Basankwa bakaimba lwiimbo lwakulumba Jehova lwakuti: ‘Jehova wazunda. Wazyilobya nkalaki mulwizi abasikalumamba bazyitantide.’ Mucizyi wa Musa, Miliyamu wakabweza nsakalala, eelyo boonse bamakaintu bakamuccilila ansakalala zyabo. Nobakali kuzyana cakukkomana, bakaimba ndweena lwiimbo lwakali kwiimba basankwa lwakuti: ‘Jehova wazunda. Wazyilobya nkalaki mulwizi abasikalumamba bazyitantide.’
Kulonga caandaano 12 kusikila ku 15.
Mibuzyo
- Bali bongaye basankwa bana Isilayeli kubikkilizya abamakaintu abana aabo bakazwa mu Ijipiti, alimwi mbabaani abamwi mbocakaunka limwi?
- Wakalimvwa buti Falawo naakamana kubaleka bana Isilayeli kuunka, alimwi ncinzi ncaakacita?
- Ncinzi Jehova ncaakacita kutegwa bana Ijipiti batabalwani bantu bakwe?
- Ncinzi cakacitika Musa naakatandabika nkoli yakwe a Lwizi Lusalala, alimwi ncinzi bana Isilayeli ncobakacita?
- Ncinzi cakacitika kubana Ijipiti nibakabaccilila bana Isilayeli mulwizi?
- Mbuti bana Isilayeli mbobakatondezya kukkomana akulumba kuli Jehova akaambo kakufwutulwa nkobakafwutulwa?
Mibuzyo aimwi
- Bala Kulonga 12:33-36.
Mbuti Jehova mbwaakabapa bulumbu bantu bakwe akaambo kakupenga nkobakapenga mumyaka yoonse yabuzike kubana Ijipiti? (Kul. 3:21, 22; 12:35, 36)
- Bala Kulonga 14:1-31.
Mbuti majwi aa Musa aalembedwe ku Kulonga 14:13, 14 mbwaabajatikizya babelesi ba Jehova mazuba aano mbobalangila nkondo iiboola ya Amagedoni? (2 Mak. 20:17; Int. 91:8)
- Bala Kulonga 15:1-8, 20, 21.
Nkaambo nzi babelesi ba Jehova ncobeelede kumwiimbila Jehova ntembauzyo? (Kul. 15:1, 2; Int. 105:2, 3; Ciy. 15:3, 4)
Ino ncikozyanyo nzi cakwiimbila Jehova nyimbo Miliyamu abamakaintu bamwi ncobakacita a Lwizi Lusalala mbociyandika kuli bamakaintu Banakristo mazuba aano? (Kul. 15:20, 21; Int. 68:11)
Andiza Inga Mwaakkomanina Ayaaya
ZIFWANIKISO IZIGWASYILIZYA BANA KWIIYA BBAIBBELE
Jehova Wabafwutula Bana Israyeli
Nkaambo nzi Musa ncaatakabayoowa basikalumamba bana Egepita ciindi bana Israyeli banji nobakayoowede?
