¡KʼELA ja jas wan ekʼeli! Ja Moisés sjachunej ja snajbʼanteʼ sbʼaja mar Rojo. Ja matik teysmok ja bʼa skʼaxili yeʼnle ja israʼelenyo sok mini jas wan ekʼel sbʼaje. Pe ja faraón sok ja skʼakʼanumi naki wane sjikʼjel jaʼ. La kiltik jastal ekʼ ja it.

Jastal jnebʼunejtikxa, tsaʼan yajni chʼak koʼuk ja lajune desgrasya ja bʼa Egipto, ja faraón yala yabʼ aʼeluke ja israʼelenyo. Elye jun 600 mil winike israʼelenyo sok jitsan ixuk sok yal untik. Chomajkil, tuk ixuk winik yilawe ja jasa skʼulan ja Jyoba, skʼuʼane bʼa Yeʼna sok wajye soka israʼelenyo. Spetsanile yajni elye ja bʼa Egipto chʼak yiʼe ja xchejeʼi, ja xchiboʼe sok ja swakaxeʼi.

Bʼajtanto yuj oj eluke bʼa Egipto, ja israʼelenyo skʼanawe yi ja swinkil Egipto jastik junuk kʼulubʼal sok oro, plata sok kʼuʼalik. Ja swinkil Egipto jelni xiwel kanye yuj ja tsaʼanxta desgrasya koʼ sbʼajeʼi. Ja yuj chʼak yawe yi ja jas skʼanawe ja israʼelenyo.

Tsaʼan yajni ekʼta jujuntik kʼakʼu, ja israʼelenyo kʼotye ja bʼa mar Rojo. Ja tiw ti jijliyeʼa. Malan wan ekʼel ja it, ja faraón sok ja skʼakʼanum jumasaʼ snaʼawe malaya yuj ja yaʼawekan awajukeʼi. Yalawe: «¡Chʼakta wajuke ja jmosotiki!».

Pe ja faraón cha tukbʼi ja spensari. Weʼgo kʼe xchap ja skarro bʼa kʼakʼanel sok ja skʼakʼanum jumasaʼ. Anto ja yeʼn sok ja 600 skarro chapan leki sok chomajkil ja tuk karroʼiki tixa kʼe yi spatike ja israʼelenyo.

Yajni ja israʼelenyoʼik yilawe ti jakum ja faraón sok ja skʼakʼanum jumasaʼ, jel xiwye. Mixa staʼawe bʼa oj eluke. Bʼa jun stsʼeʼel tey ja mar Rojo, jaxa bʼa pilan stsʼeʼeli ti jakume jan ja faraón sok ja skʼakʼanumi. Pe ja Jyoba ya koʼuk jun ason ja bʼa snalane ja yeʼnle. Ja yuj ja swinkil Egipto mi xbʼobʼ yil-e ja israʼelenyoʼik bʼa oj smil-e.

Anto ja Jyoba yala yabʼ ja Moisés a-sjach ja snajbʼanteʼi sbʼaja mar Rojo. Yajni ja Moisés skʼulan ja it, Jyoba ya jak jun tsatsal ikʼ bʼa wa x-eljan ja Kʼaʼuji. Anto ja jaʼi spila sbʼaj, sok ja mari kan tekʼan bʼa xchabʼil skʼaxil.

Ja israʼelenyo kʼe stul-e yi ja sbʼejyeleʼi bʼa takin luʼum ja bʼa spilune sbʼaj ja jaʼi. Aʼayni lek ora yiʼaj bʼa oj chʼak ekʼuke ja jitsan miyon israʼelenyo sok spetsanil ja xchante man bʼa skʼaxili. Masan ja faraón sok ja skʼakʼanumi yilawe ja israʼelenyo, anto ti yiʼawe yi spatika.

Yajni ochye bʼa yoj mar ja faraón sok ja skʼakʼanumi, ja Dyosi skʼulan achʼak eluk ja setetoʼil ja skarretaʼeʼi. Ja yeʼnle jel xiwye juntiro sok och awanuke jachuk: «Jyoba yeʼnani ja maʼ wan skoltajel ja israʼelenyo ja wan tiroʼanel jmoktiki. ¡Laʼ kumxukotik!». Pe mixani bʼobʼ yujileʼa.

Jastalni waxa wila bʼa dibujo, ja Jyoba yala yabʼ ja Moisés a-sjach ja snajbʼanteʼ sbʼaja mar Rojo. Anto ja jaʼi kumxi jastalni ay ajyi sok chʼak musjukekan ja swinik ja faraón sok ja skarroʼeʼi. ¡Mini june bʼa yeʼnle kan sakʼan yujni yibʼanale ja kʼakʼanum naka ochele ja bʼa yojol ja mar!

¡Janekʼto gustoʼaxi ja israʼelenyo yuja kanye sakʼani! Ja winike yawe yi tsʼakatal ja Dyosi sok jun tsʼebʼoj, yalawe: «Ja Jyoba skʼulanta ganar jun niwan tiroʼanel. Bʼa yojol mar yaʼta sjikʼ jaʼ ja kawujik sok ja matik kajani». Míriam, ja swats ja Moisés, ya eluk ja spandereta, sok yibʼanal ja ixukeʼi chʼak yaʼwe eluk ja sbʼajeʼi. Chaʼniye sok tsʼebʼaniye jachuk: «Ja Jyoba skʼulanta ganar jun niwan tiroʼanel. Bʼa yojol mar yaʼta sjikʼ jaʼ ja kawujik sok ja matik kajani».