¡ILAWIL te bin yak ta kʼoel ta pasele! Jaʼ te Moisés te machʼa stoyoj snabateʼ ta stojol te Mar Rojoe. Te israeletik te jokinbilik yuʼun ta jejch mar te Moisese lek ay stukelik. Jaʼukmeto te Faraón sok te soldadoetik yuʼune yakalik ta sjikʼanel jaʼ stukelik. Ya jnoptik bael te bin utʼil kʼot ta pasel ini.

Jich bitʼil te la jnoptikixe, te kʼalal kʼaxix-a te slajunebal wokolile, te Faraón la yalbey te israeletik te akʼa lokʼukik bael ta Egiptoe. Jteb ma sta 600,000 ta jtul Israel winiketik te lokʼik bael ta Egipto sok jokimbilik lokʼel yuʼun antsetik, soknix te alaletike. Jaʼnix jich bayal ta jtul yantik ants winiketik te la schʼuunik te Jehovae lokʼik bael sok te israeletike. Spisil te machʼatik lokʼik bael ta Egipto la yikʼik bael stumin chijik, stentsunik sok swakaxik.

Te kʼalal mato xlokʼik bael-ae, te israeletik la skʼambeyik bael kʼuʼul te egipcioetik soknix biluketik te pastiklambil ta oro sok ta plata. Te egipcioetik bayal xiwik yuʼun ta swenta te slajibal wokolil tal ta stojolike. Jich yuʼun spisil te bintik la skʼanik te israeletike la yakʼbeyik bael.

Kʼotik ta Mar Rojo te israeletik te kʼalal ay kʼaxemix cheʼoxeb kʼajkʼal-ae. Te kʼalal yakalik ta skuxel yoʼtanik tey-ae, te Faraón sok te winiketik yuʼune la schaʼsut yoʼtanik yuʼun te bitʼil la yakʼik bael te israeletike. ¡La kakʼtik lokʼel te jmosotike!, xchiik ta yalel.

Jich la schaʼsut skʼop te Faraone. Ta oranax la schajpan te soldadoetik yuʼune soknix te carretaetik yuʼun guerrae. Jich jajch snutsik te israeletik sok 600 carretaetik yuʼun guerra soknix spisil te yantik carretaetik yuʼun Egipto.

Te kʼalal te israeletik la yilik tal te Faraón sok te soldadoetik yuʼune kʼax bayal xiwik yuʼun, melel maʼyuk banti ya lokʼik bael ta anel. Ta stsʼeelik tey ay-a te Mar Rojoe, ta jejch yak ta talel te egipcioetike. Jaʼukmeto te Jehová la yakʼ tokal ta yolil te egipciotetik sok te lum yuʼune. Jich yuʼun te egipcioetik ma juʼ yuʼunik stsakel te israeletike, melel ma la staik ta ilel.

Jich te Jehová la yalbey te Moisés te akʼa stoy te snabateʼ ta stojol te Mar Rojoe. Te kʼalal jich la spas te Moisés te Jehová la yakʼ taluk tulan ikʼ ta slokʼib kʼajkʼal jich la skʼep sba te jaʼ yuʼun te Mar Rojoe jich jil bitʼil mukʼul tsʼajkʼetik ta jujunjejch.

Jich te israeletik jajchik ochel ta beel ta yolil mar te takinix te slumile. Jalajik te kʼalal kʼaxik bael ta jejch jaʼ te millonetik ta jtul ants winiketik soknix spisil te schambalamike. Ta patil te egipcioetik la yilik yan buelta te israeletike, jich yuʼun jajch snutsik ochel ta yolil te mare.

Te kʼalal jich la spasik ini, te Diose la yakʼ lokʼuk yakan te carretaetik yuʼun guerra. Kʼax bayal xiwik yuʼun te egipcioetik sok jajchik ta aw: Te Jehová ya spas guerra ta jwentatik ta skaj te israeletike. ¡Lokʼukotik bael liʼ ini! Jaʼnax yuʼun te ma yorailukix-a.

Jich yuʼun te Jehová la yalbey te Moisés te akʼa stoy moel te snabateʼ ta stojol te Mar Rojoe, jich te bitʼil ya awil ta lokʼombae, tey-abi jajch snupʼ sba ta yan buelta te jaʼ te jich bitʼil mukʼul tsʼajkʼetik te mukotik yuʼun te egipcioetik soknix te carretaetik yuʼune. Spisil te soldadoetik yuʼun te Faraone ayik ta yolil mar-a. ¡Jich maʼyuk jtuluk egipcio te kuxul jilele!

¡Kʼax bayal akʼbot stseʼelil yoʼtan te lum yuʼun Dios te bitʼil la staik skolelik stukelike! Te winiketik la skʼayojtayik jun kʼayojil ta stojol Jehová ta yalbeyel wokol te jich la yalike: Te Jehová la yaʼiyix tsalaw, melel la schʼojtiklan ochel ta mar te kawuetik sok te machʼatik kajajtik tey-ae. Te María te swix te Moisés la slokʼes tal spandereta sok jajch ta tʼunel yuʼun spisil te yantik antsetike. Yakalik ta ajkʼot sok ta kʼayoj: Te Jehová la yaʼiyix tsalaw, melel la schʼojtiklan ochel ta mar te kawuetik sok te machʼatik kajajtik tey-ae.