Vhonani zwine zwa khou itea! Ndi Mushe a re na lubaḓa lwo sumbaho nṱha ha Lwanzhe Lutswuku. Vhane vha vha nae kha iṅwe thungo vho vhulungea ndi Vhaisiraele. Fhedzi Farao na mmbi yawe vha khou nwela khothe lwanzheni. Kha ri vhone uri izwi zwo itea hani.

Samusi ro guda, Farao o vhudza Vhaisiraele u ṱuwa Egipita nga murahu Mudzimu o no ḓisa ṱhamu ya vhufumi kha Vhaegipita. Vhanna vha ṱoḓaho u vha 600 000 vha Vhaisiraele vha ṱuwa, khathihi na vhasadzi vhanzhi na vhana. Na vhaṅwe vhathu vhanzhi, vhe vha vha vhatendi kha Yehova, vha ṱuwa na Vhaisiraele. Vhoṱhe vha ṱuwa na nngu dzavho na mbudzi na kholomo.

Vhaisiraele vha sa athu u ṱuwa vha humbela Vhaegipita zwiambaro na zwithu zwo itwaho nga musuku na maseṱha. Vhaegipita vho vha vho tshuwa zwihulu, nga iḽa ṱhamu ya u fhedza nṱha havho. Ngauralo vha fha Vhaisiraele zwe vha humbela.

Nga murahu ha maḓuvhanyana Vhaisiraele vha ḓa Lwanzheni Lutswuku. Vha awela henefho. Zwenezwo. Farao na vhanna vhawe vha thoma u ḓisola nge vha vha vho ṱuwisa Vhaisiraele. Vha ri: ‘Ro litsha phuli dzashu dza ṱuwa!’

Ngauralo Farao a dovha a shandula ngelelo yawe. A ṱavhanya a lugisa goloi dzawe dza nndwa na mmbi yawe. Zwenezwo a thoma u pandamedza Vhaisiraele nga goloi dza 600 dzo khetheaho, na dziṅwe goloi dzoṱhe dza Egipita.

Musi Vhaisiraele vha tshi vhona Farao na mmbi yawe vha tshi khou ḓa murahu havho, vha ofha zwihulu. Ho vha hu si na nḓila ya u shavha. Lwanzhe Lutswuku lwo vha lu phanḓa havho, na Vhaegipita khevha vha tshi khou ḓa nga murahu. Fhedzi Yehova a vhea gole vhukati ha vhathu vhawe na Vhaegipita. Ngauralo Vhaegipita vho vha vha sa koni u vhona Vhaisiraele.

Zwenezwo Yehova a vhudza Mushe uri a imise lubaḓa lwawe kha Lwanzhe Lutswuku. Musi o ita ngauralo, Yehova a ita uri hu vhe na muya muhulu wa vhubvaḓuvha. Maḓi a lwanzhe a fhandakana, maḓi a farwa thungo dzoṱhe.

Zwenezwo Vhaisiraele vha thoma u tshimbila vhukati ha lwanzhe kha mavu o omaho. Zwa dzhia tshifhinga uri vha wele lwanzhe ngauri vho vha vhe vhanzhi-vhanzhi. Mafheleloni Vhaegipita vha konou vhona Vhaisiraele. Phuli dzavho dzo vha dzi tshi khou ṱuwa! Ngauralo vha dzhena lwanzheni vha vha tevhela.

Musi vha tshi vha tevhela, Mudzimu a ita uri milinga ya dzigoloi dzavho i we. Vhaegipita vha ofha zwihulu vha thoma u lila: ‘Yehova u khou lwela Vhaisiraele. Kha ri bve afha!’ Fhedzi ho vha ho no vha u lenga.

Ndi ha musi Yehova a tshi vhudza Mushe u imisa lubaḓa lwawe kha Lwanzhe Lutswuku, samusi no zwi vhona tshifanyisoni. Zwenezwo mbondo dza maḓi dza thoma u vhuya dza tiba Vhaegipita na goloi dzavho. Mmbi yoṱhe yo vha yo tevhela Vhaisiraele lwanzheni. A hu na na muthihi wa Vhaegipita we a tshila!

Vhathu vha Mudzimu vha takala hani nge vha tshila! Vhanna vha imba luimbo lwa u livhuha Yehova, vha tshi ri: ‘Yehova o wana gundo ḽihulu. O posa dzibere na vhanameli vhadzo lwanzheni.’ Khaladzi a Mushe, Miriama a dzhia murumba wawe, na vhasadzi vhoṱhe vha mu tevhela nga mirumba yavho. Vha tshi khou tshina nga dakalo, vha imba luimbo lu fanaho na lwa vhanna: ‘Yehova o wana gundo ḽihulu. O posa dzibere na vhanameli vhadzo lwanzheni.’

Ekisodo dzindima 12 a ya kha 15.