KITAA an nahitatabo! An lalaki dinhi ha retrato nga nag-uunat han iya tungkod ngada ha Dagat nga Pula amo hi Moises. An iya mga kaupod nga talwas nga nakatabok amo an mga Israelita. Kondi hi Paraon ngan an ngatanan nga iya kasundalohan nagkakalulumos ha dagat. Kitaon naton kon kay ano nga nahitabo ini.

Sugad han aton hinbaroan, ginpalakat ni Paraon an mga Israelita katapos ipadapat han Dios an ika-10 nga peste ha mga Ehiptohanon. Mga 600,000 nga Israelita nga kalalakin-an an binaya, gawas pa han damu nga kababayin-an ngan kabataan. Inupod liwat ha ira an damu nga diri-Israelita nga nagin mga tumuroo ni Jehova. Gindara nira ngatanan an ira kakarnerohan, kakandingan, ngan kabakahan.

Antes bumaya an mga Israelita, nangaro hira ha mga Ehiptohanon hin mga bado ngan gamit nga bulawan ngan salapi. Nahadlok gud an mga Ehiptohanon tungod han ultimo nga peste nga iginpadapat ha ira. Salit iginhatag nira an ngatanan nga gin-aro han mga Israelita.

Katapos hin pipira ka adlaw, inabot an mga Israelita ha Dagat nga Pula. Pinahuway hira didto. Samtang hito nga panahon, nagbasol hi Paraon ngan an iya katawohan nga ginpalakat nira an mga Israelita. ‘Ginpalakat naton an aton mga uripon!’ siring nira.

Salit nagbag-o utro an hunahuna ni Paraon. Iginpaandam niya dayon an iya mga karomata ha pakig-away ngan an iya kasundalohan. Katapos, upod han 600 nga espesyal nga karomata ngan han iba pa nga karomata han Ehipto, iya ginlanat an mga Israelita.

Han nakita han mga Israelita nga ginlalanat hira ni Paraon ngan han iya kasundalohan, nahadlok gud hira. Waray hira mapapalagiwan. Ha ira atubangan amo an Dagat nga Pula, ngan ha ira luyo nagtitiarabot an mga Ehiptohanon. Kondi nagbutang hi Jehova hin dampog butnga han iya katawohan ngan han mga Ehiptohanon. Salit waray nira makita an mga Israelita nga ira ginlalanat.

Ginsugo ni Jehova hi Moises nga iunat an iya tungkod ngada ha Dagat nga Pula. Han ginbuhat niya ito, ginpahinabo ni Jehova nga magkaada makusog nga hangin tikang ha sinirangan. Nabahin an katubigan han dagat ngan napugngan ito ha paluyo-luyo.

Katapos, nagbaktas an mga Israelita ha mamara nga tuna han dagat. Inabot hin damu ka oras an pagtabok han minilyon nga tawo upod an ngatanan nga hayop. Katapos hito, nakita utro han mga Ehiptohanon an mga Israelita. Napalagiw an ira mga uripon! Salit linugsong dayon hira ha mamara nga tuna han dagat basi lanaton an mga Israelita.

Samtang naglalanat an mga Ehiptohanon ha dagat, ginpanangtang han Dios an mga kaliding han ira mga karomata. Nahadlok gud hira ngan naggugliat: ‘Hi Jehova nakikig-away ha aton para ha mga Israelita. Iwas kita dinhi!’ Kondi waray na hira mahihimo.

Hito nga takna ginsugo ni Jehova hi Moises nga iunat an iya tungkod ngada ha Dagat nga Pula, sugad han makikita mo ha retrato. Ngan han gin-unat ni Moises an iya tungkod, binalik an tubig ngan natabonan an mga Ehiptohanon ngan an ira mga karomata. Hunahunaa la, linugsong ha dagat an ngatanan nga kasundalohan basi lanaton an mga Israelita. Ngan waray bisan usa nga Ehiptohanon an natalwas!

Malipayon gud an ngatanan nga katawohan han Dios tungod kay natalwas hira! An kalalakin-an nagkanta ha pagpasalamat kan Jehova, nasiring: ‘Hi Jehova mahimayaon nga nagdaog. Iginlabog niya ha dagat an mga kabayo ngan an mga sakay hito.’ Ginkuha han bugto ni Moises nga hi Miriam an iya tamborin, ngan sinunod ha iya an ngatanan nga kababayin-an dara an ira tamborin. Ngan samtang malipayon nga nasayaw hira, ginkakanta nira an ginkakanta han kalalakin-an: ‘Hi Jehova mahimayaon nga nagdaog. Iginlabog niya ha dagat an mga kabayo ngan an mga sakay hito.’