ALOLE yayikutendekwayo! Jwatambasukulile simbo jakwe pa Nyasa Jecejewujo ali Musa. Ŵali nawowo ali Ayisalayeli. Nambo Falao ni likuga lyakwe lyangondo akutiŵila m’nyasamo. Kwende tulole muyatendecele yeleyi.

Mpela mwatulijiganyicisye kala, Falao ŵakundile Ayisalayeli kutyoka, Mlungu paŵayikasisye Mlili wa 10 pa Aeguputo. Ayisalayeli ŵacilume ciŵandika 600,000 soni acakongwe ni ŵanace ŵajinji ŵatyosile ku Eguputo. Nambosoni ŵandu ŵane ŵajinji, ŵaŵatandite kumkulupilila Yehofa, ŵatyosile yalumo ni Ayisalayeli. Ŵajigele ngondolo, mbusi ni ng’ombe syawo paulendowu.

Mkananyakuce ulendowo, Ayisalayeli ŵaŵendile Aeguputo yakuwala, soni yindu yine yakupanganya ni golidi ni silifa. Aeguputo wakamwile mnope woga, ligongo lya mlili wakumalisya wawagwilile. M’yoyo ŵapele Ayisalayeli yiliyose yaŵaŵendile.

Pambesi pa masiku gakuŵalanjika, Ayisalayeli ŵayice pa Nyasa Jecejewu. Ŵapumwile pelepo. Payatendekwaga yeleyi, Falao ni ŵandu ŵakwe ŵaligambaga kuti ŵakundile Ayisalayeli kutyoka. Jemanjajo ŵatiga kuti, ‘Twakundile acikapolo ŵetu kwawula!’

Sambano Falao ŵasindilesoni nganisyo syakwe. Jwalakwe mwacitema ŵakosecelesye ligeleta lyakwe lya ngondo ni asilikali ŵakwe. Kaneko ŵatandite kwawutucila Ayisalayeli ni yigeleta yakwe yapajika yakwana 600, soni yigeleta yine ya mu Eguputo.

Ayisalayeli paŵam’weni Falao ali mkwika yalumo ni asilikali ŵakwe, wakamwile mnope woga. Kwaliji kwangali kwakutilila. Mbali jine kwaliji Nyasa Jecejewu, mbali jineji kwayikaga Aeguputo. Nambo Yehofa ŵaŵisile liwunde pasikati pa ŵandu ŵakwe ni Aeguputo. M’yoyo Aeguputo nganakombolaga kwawona Ayisalayeli kuti ŵakamule.

Kaneko Yehofa ŵamsalile Musa kutambasukulila simbo jakwe pa Nyasa Jecejewu. Paŵatesile yeleyi, Yehofa ŵajipujikasisye mbungo jamacili jakutyocela kungopoko lyuŵa. Mesi ga m’nyasamo gagaŵikene ni kwima mpela lipupa mbali jine ni jine.

Kaneko Ayisalayeli ŵajombwece nyasajo pamalo gamajumu. Yajigele ndaŵi jelewu kuti ŵandu mamiliyoni yimpepe ni yilango yawo ajombocele lisi linelyo. Kaneko Aeguputo ŵakombolagasoni kwawona Ayisalayeli ŵala. Acikapolo ŵawo ŵaliji mkutila! Sambano jemanjajo ŵagambile kwinjila m’nyasamo.

Paŵagambile kwinjila, Mlungu ŵatendekasisye kuti yitungulu ya yigudumu yawo yikuliceje. Aeguputo wakamwile mnope woga ni ŵatandite kulila acitiji: ‘Yehofa akwaputila ngondo Ayisalayeli pa m’weji. Kwende tukopoce amuno!’ Nambo kwaliji kucelewa.

Pakatema keleka, Yehofa ŵamsalile Musa kutambasukulila simbo jakwe m’Nyasa Jecejewu, mpela mwakuti kuyiwona paciwulilipa. Musa paŵatambasukulile simbo panyasapo, mapupa ga mesi gala gatandite kuwujangana mpela mwagaŵelele pandanda ni gatiŵisye Aeguputo ni yigeleta yawo. Likuga lyosope lya asilikali lyaliji lili lyakuyiye Ayisalayeli m’nyasa mula. Ni paliji pangali atamose mu Eguputo jumo juŵakopwece jwacijumi!

Ŵandu ŵa Mlungu ŵaliji ŵakusangalala kuti akulupwice! Acalume ŵajimbile nyimbo syakutogolela Yehofa, acitiji: ‘Yehofa apundile mnope ngondo. Jwalakwe aponyisye mahaci ni ŵakugakwela ŵakwe m’nyasa.’ Mlumbugwe Musa, Miliyamu, ŵajigele kangoma kakwe, ni acakongwe wosope ŵamkuyaga ni tungoma twawo. Ŵajimbaga nyimbo jaŵajimbaga acalume jila jakuti: ‘Yehofa apundile mnope ngondo. Jwalakwe aponyisye mahaci ni ŵakugakwela ŵakwe m’nyasa.’ Ŵatendaga yeleyi ali mkuŵina.