Historia 33

Ra gudíʼdicabe nisadóʼ Xiñáʼ

¡BIIYAʼ xi cayaca! Moisés nga cuzaabiʼ ti vara lu nisadóʼ Xiñáʼ ca. Ca binni ni bilá zuhuaané laabe uriá nisa ca la? nga nga ca israelita. Peru Faraón ne ca xpinni cayáticaʼ guiiguʼ. Guidúʼyanu ximodo guca ndiʼ.

Casi maʼ bizíʼdinu la? gudiʼdiʼ si chii plaga que Faraón gudxi ca israelita que guireecaʼ de Egipto. Biaʼ 600.000 hombre israelita bireecaʼ, ne stale gunaa ne baʼduhuiiniʼ. Laaca biree stuudxi binni ni biʼniʼ cré Jiobá ne ca israelita que. Guirácabe yenécabe dendxuʼ ne chiva ne yuze stícabe ora bireecabe de Egipto.

Ante guiree ca israelita que la? gunábacabe ca egipciu gudii laacabe lari ne xiixa de oro o de plata. Cumu guizáʼ bidxibi ca egipciu que últimu plaga beeda que la? bidiicabe ca israelita que guiráʼ ni gunábacaʼ laacabe.

Gupa si tuudxi dxi la? ca israelita que bidxíñacaʼ ra nuu nisadóʼ Xiñáʼ que. Raqué biziláʼdxicabe. Laga nuucabe raqué la? Faraón ne ca xpinni guniʼcaʼ xiñee bidiicaʼ lugar zeʼ ca israelita que. ¡Bidiinu lugar zeʼ ca esclavu stinu! nacaʼ.

Ngue runi Faraón bidxaa modo guníʼ ique sti biaje. Oraqueca guníʼnebe ca xpínnibe ne binichaahuicabe ca carru ni rinécabe lu guendaridinde. Óraque zinándabe ca israelita que ne 600 carru ni gulibe, ne xcaadxi de ca carru ni nuu Egipto.

Ora biiyaʼ ca israelita que zeeda Faraón ne ca xpinni la? guizáʼ bidxíbicaʼ. Qué gápacabe paneza guxooñecabe. Ti ladu que nuu nisadóʼ, ne sti ladu que la? zeeda ca egipciu que. Peru Jiobá guluu ti za galaa de laacabe, ngue runi ca egipciu que, qué ñanda diʼ ñuuyacabe ca israelita que para nucaalúcabe laacaʼ.

Óraque Jiobá gúdxibe Moisés gusigaa naʼ ne bara stiʼ lu nisadóʼ Xiñáʼ que. Ora biʼniʼ Moisés ni la? Jiobá biseenda ti bi guizáʼ nadipaʼ ni zeeda neza ra rindani gubidxa para gundubi. Nisadóʼ que bixeleʼ ne bizuhuaa ca nisa que guiropaʼ uriá ni.

Óraque ca israelita que bizulú gudíʼdicaʼ galaa nisadóʼ que lu layú nabidxi xhuxhu. Cumu stalepecabe la? biquiiñecabe stale hora para gudíʼdicabe ne ca maniʼ stícabe sti ladu que. Ca egipciu que gunda biiyacaʼ ca esclavu que cuxooñecaʼ de laacabe, ne yenándacaʼ laacabe ndaaniʼ nisadóʼ que.

Guyuusicabe ndaaniʼ nisa que la? Dios guxha rueeda stiʼ xcárrucabe. Ca egipciu que guizáʼ bidxíbicaʼ ne bicaacabe ridxi: Jiobá cadinde pur ca israelita riʼ. ¡Chuu de raríʼ! Peru maʼ qué ñanda diʼ nireecabe.

Óraque Jiobá gudxi Moisés guzaabiʼ vara stiʼ lu nisadóʼ Xiñáʼ que, casi biiyaluʼ lu dibuju que. Óraque bixataʼ ca nisa que ne bindaahuani ca egipciu que ne carru sticaʼ. Guiráʼ xixé xpínnibe guyuucaʼ ndaaniʼ nisa que. ¡Ne nin tobi de ca egipciu que, qué nilacaʼ!

¡Pabiáʼ biecheʼ xquidxi Dios pur bilacaʼ yaʼ! Ca hombre que biindacaʼ para bidiicaʼ xquixe Jiobá, nacaʼ: Jiobá maʼ biʼniʼ ganar lu guendaridinde riʼ. Ndaaniʼ nisadóʼ riʼ guluube ca maniʼ ca ne ca hombre dxiʼbaʼ laacame. Míriam, bizaʼnaʼ Moisés la? gulee pandereta stiʼ ne guiráʼ gunaa que yenanda laabe ne xpanderétacaʼ, ne biyaacabe ne laaca biindacabe: Jiobá maʼ biʼniʼ ganar lu guendaridinde riʼ. Maʼ guluube ca maniʼ ca ne ca hombre dxiʼbaʼ laacame ca ndaaniʼ nisadóʼ.

Éxodo, capítulo 12 hasta 15.