Mose nyɛɛ Israelbi ɔmɛ a hɛ mi kɛ je nyɔguɛ si himi mi ngɛ Mizraim kɛ ya su Sinai Yoku ɔ he, nɛ Mawu ha mɛ e mlaa amɛ ngɛ lejɛ ɔ. Pee se ɔ, Mose tsɔ nyumuhi 12 nɛ a ya slaa Kanaan zugba a. Se, a kpɛti nihi 10 ngɔ amaniɛbɔ yaya kɛ ba. A wo mabi ɔmɛ he wami konɛ a kpale a se kɛ ya Mizraim. Mawu ha Israelbi ɔmɛ nyɛɛ nga a nɔ jeha 40 kɛ gbla a tue ngɛ hemi kɛ yemi nɛ a be ngɛ e mi ɔ heje.

Nyagbe ɔ, a hla Yoshua konɛ e nyɛɛ Israelbi ɔmɛ a hɛ mi kɛ ya Kanaan zugba a nɔ. Yehowa pee nyakpɛ ní konɛ e kɛ ye bua mɛ nɛ a nine nɛ su zugba a nɔ. E ha nɛ Yordan Pa a mi gba, Yeriko gbogbo ɔ ku pue si, nɛ pu da si ligbi mluku kake. Jeha ekpa se ɔ, a kpɔ ma a ngɛ Kanaanbi ɔmɛ a dɛ.

Nyadali nyɛɛ Israel ma a hɛ mi jeha 356, nɛ Yoshua ji kekle nyadalɔ. Wa maa kase a ti nihi fuu kaa Barak, Gideon, Yefta, Samson kɛ Samuel a he ní. Wa maa kane yihi komɛ kaa Rahab, Debora, Yael, Rut, Naomi kɛ Delila hu a he sane. Mi Gbami ETƐ ɔ tsuo ngɔ be nɛ su jeha 396 ngɛ yinɔ sane mi.