Moses i lidim ol man Isrel oli aot long kalabus long Ijip, oli go long Hil ya Sinae. Long ples ya, God i givim ol loa blong hem long olgeta. Biaen, Moses i sanem 12 man oli go blong spae long kantri blong Kenan. Be 10 long olgeta ya oli karem wan nogud ripot i kambak. Oli mekem se ol man Isrel oli wantem tanraon mo gobak long Ijip. God i panisim olgeta from we oli no trastem hem, i mekem olgeta oli wokbaot long draeples blong 40 yia.

Biaen, hem i jusum Josua blong lidim ol man Isrel oli go long kantri blong Kenan. Jeova i mekem plante merikel blong givhan long olgeta blong tekem kantri ya i blong olgeta. Hem i blokem wota blong Jodan Reva, hem i mekem stonwol blong Jeriko i foldaon, mo i mekem se san i saen blong wan fuldei, i no godaon. Afta we sikis yia i pas, oli tekemaot kantri ya long han blong ol man Kenan.

Blong 356 yia, ol jaj oli rul long Isrel, Josua i faswan blong olgeta. Bambae yumi tokbaot plante long olgeta, olsem Barak, Gideon, Jeftaha, Samson, mo Samuel. Mo tu, bambae yumi ridim stori blong ol woman ya Rehab, Debora, Jael, Rut, Nomi, mo Delila. Haf TRI i tokbaot 396 yia blong histri we ol samting ya oli hapen long hem.