Laj Moises kirisihebʼ laj Israel saʼ li tenamit Egipto ut kixkʼamebʼ saʼ li tzuul Sinai, aran li Yos kixkʼe li xchaqʼrabʼ re li xtenamit. Chirix chik aʼan laj Moises kixtaqla 12 chi winq chi rilbʼal li tenamit Canaan. Abʼan 10 rehebʼ li winq keʼxye naq li wankebʼ Canaan jwal nimebʼ ut kawebʼ ribʼ, joʼkan naq ebʼ laj Israel keʼraj sutqʼiik Egipto. Li Yos kichalk xjosqʼil xbʼaan naq ebʼ laj Israel moko kawebʼ ta xpaabʼal. Ut kixkʼehebʼ chi xbʼeeninkil ribʼ saʼ li chaqichʼochʼ chiru 40 chihabʼ.

Tojaʼ naq li Yos kixsikʼ ru laj Josue re naq aʼan tkʼamoq rehebʼ laj Israel saʼ li tenamit Canaan. Li Jehobʼa kixbʼaanu ebʼ li sachbʼachʼoolej re naq teʼruuq reechaninkil li tenamit. Kixbʼaanu naq li nimaʼ Jordan tchaqik, kixbʼaanu naq li xnubʼaal li tenamit Jerico ttʼaneʼq ut kixbʼaanu ajwiʼ naq li Saqʼe tkanaaq saʼ xyi li choxa chiru jun kutan. Naq kinumeʼk waqibʼ chihabʼ ebʼ laj Israel keʼreechani li tenamit Canaan.

Chiru 356 chihabʼ junes ebʼ aj raqol aatin keʼawabʼejink re li tenamit Israel. Laj Josue kiwank choʼq xbʼeen aj raqol aatin. Qatzolaq chirix laj Barac, laj Gedeon, laj Jefte, laj Sanson ut laj Samuel. Joʼkan ajwiʼ chirixebʼ li ixq joʼ li xRahab, li xDebora, li xJael, li xRut, li xNoemi ut xDalila. Chiru 396 chihabʼ kikʼulmank chixjunil li wank saʼ li ROX Tasal aʼin.