ಮೋಶೆಯು ಇಸ್ರಾಯೇಲ್ಯರನ್ನು ಐಗುಪ್ತದ ಬಂದಿವಾಸದಿಂದ ಬಿಡಿಸಿ ಸೀನಾಯಿ ಬೆಟ್ಟಕ್ಕೆ ನಡೆಸಿದನು. ಅಲ್ಲಿ ದೇವರು ಅವರಿಗೆ ತನ್ನ ನಿಯಮಗಳನ್ನು ಕೊಟ್ಟನು. ತದನಂತರ, ಕಾನಾನ್‌ ದೇಶವನ್ನು ಗುಟ್ಟಾಗಿ ಸಂಚರಿಸಿ ನೋಡುವುದಕ್ಕಾಗಿ ಮೋಶೆಯು 12 ಮಂದಿ ಪುರುಷರನ್ನು ಕಳುಹಿಸಿದನು. ಆದರೆ ಅವರಲ್ಲಿ 10 ಮಂದಿ ಕೆಟ್ಟ ವರದಿಯೊಂದಿಗೆ ಹಿಂದಿರುಗಿದರು. ಅವರಿಂದಾಗಿ ಜನರು ತಿರುಗಿ ಐಗುಪ್ತಕ್ಕೆ ಹೋಗಲು ಬಯಸಿದರು. ಅವರ ನಂಬಿಕೆಯ ಕೊರತೆಯ ಕಾರಣ, ದೇವರು ಇಸ್ರಾಯೇಲ್ಯರನ್ನು 40 ವರ್ಷಗಳ ತನಕ ಅರಣ್ಯದಲ್ಲಿಯೇ ಅಲೆಯುವಂತೆ ಬಿಟ್ಟು ಶಿಕ್ಷಿಸಿದನು.

ಕೊನೆಗೆ, ಇಸ್ರಾಯೇಲ್ಯರನ್ನು ಕಾನಾನ್‌ ದೇಶದೊಳಗೆ ನಡೆಸಲು ಯೆಹೋವನು ಯೆಹೋಶುವನನ್ನು ಆರಿಸಿದನು. ಅವರು ದೇಶವನ್ನು ವಶಪಡಿಸಿಕೊಳ್ಳಲು ಸಹಾಯಮಾಡಲಿಕ್ಕಾಗಿ ಯೆಹೋವನು ಅದ್ಭುತಗಳನ್ನು ನಡೆಸಿದನು. ಯೊರ್ದನ್‌ ಹೊಳೆ ಹರಿಯುವುದು ನಿಲ್ಲುವಂತೆ, ಯೆರಿಕೋ ಪಟ್ಟಣದ ಗೋಡೆಗಳು ಬೀಳುವಂತೆ ಮತ್ತು ಸೂರ್ಯನು ಒಂದು ಇಡೀ ದಿನ ಸ್ತಬ್ಧನಾಗಿ ನಿಲ್ಲುವಂತೆ ಆತನು ಮಾಡಿದನು. ಆರು ವರ್ಷಗಳ ಅನಂತರ ದೇಶವನ್ನು ಕಾನಾನ್ಯರಿಂದ ವಶಪಡಿಸಿಕೊಳ್ಳಲಾಯಿತು.

ಯೆಹೋಶುವನಿಂದ ಆರಂಭಿಸಿ 356 ವರ್ಷಗಳ ತನಕ ಇಸ್ರಾಯೇಲ್‌ನಲ್ಲಿ ನ್ಯಾಯಸ್ಥಾಪಕರು ಆಳ್ವಿಕೆ ನಡೆಸಿದರು. ಬಾರಾಕ, ಗಿದ್ಯೋನ, ಯೆಪ್ತಾಹ, ಸಂಸೋನ ಮತ್ತು ಸಮುವೇಲರ ಸಮೇತ ಅವರಲ್ಲಿ ಅನೇಕರ ಕುರಿತು ನಾವು ಕಲಿಯುತ್ತೇವೆ. ರಾಹಾಬ್‌, ದೆಬೋರ, ಯಾಯೇಲ್‌, ರೂತ್‌, ನೊವೊಮಿ ಮತ್ತು ದೆಲೀಲಾರಂಥ ಸ್ತ್ರೀಯರ ಕುರಿತೂ ನಾವು ಓದುತ್ತೇವೆ. ಒಟ್ಟಿಗೆ ಭಾಗ ಮೂರು 396 ವರ್ಷಗಳ ಇತಿಹಾಸವನ್ನು ಆವರಿಸುತ್ತದೆ.