Chihanda 3

Kufuma Kukusokoka muEjipitu Swi Kulwola lwaMwangana WavaIsalele Watete

Mose alowele vaIsalele muundungo waEjipitu nakuvatwala kuPili Shinai, kuze avahanyine Kalunga jishimbi jenyi. Jino, Mose atumine malunga 12 kuya nakusondwesa lifuchi lyaKanane. Malunga 10 vanehele mujimbu waupi. Valingishile vatu kusaka vahiluke kuEjipitu. VaIsalele hakuhona lufwelelo, Kalunga avazangamishile hakuvalingisa valumbwangile mupambo hamyaka 40.

Jino, Yoshuwa vamusakwile atwale vaIsalele kuKanane. Yehova alingile vyuma vyakukomwesa hakuvakafwa vatambule lifuchi. Emikile meya aKalwiji Yotau, apuzwile jimbango jaYeliko, nakwimika likumbi hamwe musana wosena. Hanyima yamyaka yitanu naumwe, vatambwile lifuchi lyaKanane.

Kuputuka naYoshuwa, Isalele vayiyulile hamyaka 356 kuli vaka-kuyula. Vavavulu natulinangulavo, kuhakilako naMbalake, Ngiteyone, Yefweta, Samasone naSamwele. Natutanga nawa vyamapwevo vakufwana nge vaLahave, Ndevola, Yayele, Lute, Nowemi, naNdelila. Ngocho Chihanda CHAMUCHITATU chili nakutala havyuma vyasolokele mumyaka 396.