Ta̱ Moisés kúú ta̱ xi̱niʼi yichi̱ nu̱ú na̱ ñuu Israel, nani tá ke̱ena ñuu Egipto iin saá nda̱a̱ tá ni̱xa̱a̱na yuku̱ Sinaí nu̱ú ta̱xi Ndióxi̱ leyra ndaʼa̱na. Tá ni̱ya̱ʼa tiempo, chi̱ndaʼá ta̱ Moisés 12 ta̱a ni̱xa̱ʼa̱nna xi̱tose̱ʼéna ñuʼú Canaán. Soo 10 na̱ ni̱xa̱ʼa̱n yóʼo tá ndi̱kóna va̱ása níka̱ʼa̱nna ña̱ va̱ʼa. Ku̱a̱chi na̱yóʼo na̱ ñuu Israel xi̱kuni̱na ndi̱kóna ñuu Egipto. Xa̱ʼa ña̱ kǒo níkandíxana Ndióxi̱ xíʼin ndinuʼu-inina ña̱kán ta̱xira castigo ndaʼa̱na, ta 40 ku̱i̱ya̱ ni̱xi̱kana nu̱ú ñuʼú yi̱chí.

Tándi̱ʼi, Ndióxi̱ nda̱ka̱xinra ta̱ Josué ña̱ kuniʼira yichi̱ nu̱ú na̱ ñuu Israel ña̱ va̱ʼa ki̱ʼvina ñuʼú Canaán. Jehová ke̱ʼéra milagro ña̱ va̱ʼa chindeérana ki̱ʼvina nu̱ú ñuʼú ña̱ ni̱ka̱ʼa̱nra taxira ndaʼa̱na. Sa̱yíchi̱ra yu̱ta Jordán, sa̱ndúvara nama̱ ña̱ ñuu Jericó, ta iin ki̱vi̱ níí sa̱kúndichira Ñu̱ʼu á ña̱ Ka̱ndii. Tá ni̱ya̱ʼa 6 ku̱i̱ya̱ na̱kuchiñuna ki̱ndaana ñuʼú ndaʼa̱ na̱ ñuu Canaán.

Ta̱ Josué kúú ta̱ siʼna xi̱kuu juez ña̱ ñuu Israel. Sa̱tá ta̱yóʼo ni̱xi̱yo ku̱a̱ʼákana ta 356 ku̱i̱ya̱ ni̱xi̱yo na̱ juez ñuu Israel. Ta sakuaʼakayó xa̱ʼa savakana ta na̱yóʼo kúúna: ta̱ Barac, ta̱ Gedeón, ta̱ Jefté, ta̱ Sansón xíʼin ta̱ Samuel. Saátu sakuaʼayó xa̱ʼa ñá Rahab, ñá Débora, ñá Jael, ñá Rut, ñá Noemí xíʼin ñá Dalila. Ndiʼi ña̱ va̱xi nu̱ú ña̱ TÁʼVI 3 yóʼo ku̱uña ti̱xin 396 ku̱i̱ya̱.