Rä Moises bi gu̱ki yä israelita dende Ejipto habu̱ mi mꞌe̱go ꞌne bi zitsꞌi asta ha rä tꞌo̱ho̱ Sinäi, habu̱ Äjuä bi umbi Yä mhända. Mꞌe̱fa, rä Moises bi me̱hni 12 yä ñꞌo̱ho̱ pa dä hyandi näꞌä rä hai Kanään. Pe mi mengi 10 de geꞌu̱, himbä hä yä hogä noya. Hänge yä jäꞌi mi ne dä mengi ha Ejipto. Yä israelita bi ꞌñudi ge himi kamfri Äjuä. Hänge Äjuä bi kastiga nuꞌu̱ yä israelita ꞌne bi japi bi ñꞌo 40 yä je̱ya de gä nani ha yä yꞌotꞌä hai.

Mꞌe̱fa, Äjuä bi huahni rä Josue pa dä zitsꞌi yä israelita ha rä hai Kanään. Jeoba bi ja yä milagro pa bi matsꞌi yä israelita bi hñäni näꞌä rä dähni. Jeoba bi ꞌmaꞌmi rä däthe Jordan, bi japi bi dagi yä jädo rä hnini Jeriko ꞌne himbi hyopi bi yu̱i rä Hyadi po 24 yä ora. Rꞌato nje̱ya mꞌe̱fa, yä israelita ya xki hñäni näꞌä rä hai Kanään.

Po 356 yä je̱ya bi mända yä nzaya ha rä hnini Israel. Bi mu̱di ko rä Josue. Ma gä pädihu̱ rꞌa de gehyu̱, ngu rä Barak, Jedeon, Jefte, Sanson ꞌne rä Samuel. ꞌNehe ma gä pädihu̱ de rꞌa yä ꞌme̱hñä ngu rä Raab, Debora, Jael, Rut, Noemi ꞌne rä Dalila. Gatꞌho nuꞌu̱ yä thogi mää ha nunä RÄ NTHEKE 3, bi zitsꞌi 396 yä je̱ya.