Moisés a guia e israelitanan for di sklabitut na Egipto te na Seru Sinaí, kaminda Dios a duna nan su leinan. Despues, Moisés a manda 12 hòmber pa spioná e tera di Kánaan. Pero dies di nan a bini bèk ku un mal informe. Nan a hasi e pueblo deseá di bai Egipto bèk. Pa nan falta di fe, Dios a kastigá e israelitanan, hasiendo nan dual pa 40 aña den desierto.

Finalmente, Josué a wòrdu skohí pa guia e israelitanan pa nan drenta e tera di Kánaan. Pa yuda nan poderá di e tera, Yehova Dios a laga milager sosodé. El a para awa di Riu Hordan, a hasi muraya di Jeriko basha abou i a pone solo para ketu pa henter un dia. Despues di seis aña, nan a kita e tera for di e kananeonan.

Kuminsando ku Josué, huesnan a goberná Israel pa 356 aña. Nos lo siña tokante hopi hues, inkluyendo Barak, Gideon, Jefte, Samson i Samuel. Nos lo lesa tambe tokante hende muhénan manera Rahab, Débora, Jael, Ruth, Noemí i Dalila. En total, Parti TRES ta kubri 396 aña di historia.