Ri Moisés xeʼukʼam bʼi ri täq israelitas chiʼ xeʼel pa Egipto tekʼuriʼ xeʼukʼam bʼik jachiʼ, o ni, kʼo ri jun juyubʼ ubʼiʼ Sinaí, chilaʼ ri Ajawaxel xuya ri utaqonik (leyes) chike. Tekʼuriʼ, Moisés xeʼutaq bʼi 12 achijabʼ rech kebʼe che urilik ri tinamit Canaán. Tekʼuriʼ e 10 chike, xkemol tzij chirij ronojel su xkilo. Rumal wariʼ, ri israelitas xkaj xetzalij pa Egipto. Rumal che xekojon täj, ri Ajawaxel xubʼan chike che xebʼin 40 junabʼ pa täq chaqiʼj ulew (desierto).

Kʼisbʼal re, xchaʼ ri Josué rech keʼukʼam bʼi täq israelitas pa täq ulew rech Canaán. Rech xeʼok chupam wa täq ulew, Jehová xubʼan kʼi täq etal, o maybʼäl. Xuqʼatij (xuʼatmij) ri nim jaʼ (bʼeyaʼ) ubʼiʼ Jordán, xubʼano che xetzaq lo ri nimalaj täq tapya rech ri tinamit Jericó xuqujeʼ xubʼano che ri Qʼij naj xkaʼyik, rumal wariʼ xubʼan ta qʼequʼm chanim. Xa waqibʼ junabʼ xukʼam bʼik rech xesax ri ulew chike ri täq aj Canaán.

E kʼo nikʼaj achijabʼ xbʼix jueces chike, xkebʼan ajkʼamol täq bʼe 356 junabʼ puwiʼ ri Israel, ri nabʼe chike ri ajkʼamol täq bʼe are ri Josué. Kʼi kqetaʼmaj chikij, jujun chike are: Barac, Gedeón, Jefté, Sansón xuqujeʼ Samuel. Xuqujeʼ kqetaʼmaj chikij wa nikʼaj ixoqibʼ: Rahab, Débora, Jael, Rut, Noemí xuqujeʼ Dalila. Ri UROX Jupuq täq bʼantajik kutzʼaqatsaj 396 junabʼ.