මෝසෙස් ඉශ්‍රායෙල්වරුන්ව ඊජිප්තුවේ වහල්භාවයෙන් බේරාගෙන දෙවි ඒගොල්ලන්ට නීති දුන්න සීනයි කන්ද ළඟටම මඟ පෙන්වාගෙන ආවා. ඊට පස්සේ, කානාන් දේශයේ ඔත්තු බලන්න මිනිස්සු 12දෙනෙක්ව යැව්වා. ඒ වුණාට ඒගොල්ලන්ගෙන් 10දෙනෙක් ගෙනාවේ නරක වාර්තාවක්. ඒ අය කිව්ව දේවල් නිසා සෙනඟට ආයෙත් ඊජිප්තුවට යන්න හිතුණා. ඉශ්‍රායෙල්වරුන්ට විශ්වාසයක් තිබුණේ නැති නිසා, දෙවි ඒගොල්ලන්ට දඬුවම් කළා. දඬුවම නම් අවුරුදු 40ක් පුරා පාළුකරයේ තැනින් තැනට යන්න සැලැස්වීමයි.

අන්තිමේදී, කානාන් දේශයට ඉශ්‍රායෙල්වරුන්ව ගෙනියන්න දෙවි තෝරාගත්තේ යෝෂුවාවයි. ඒගොල්ලන්ට ඒ දේශය අල්ලගන්න උදව් වෙන්න යෙහෝවා පුදුම දේවල් කළා. ගලාගෙන යන යොර්දාන් ගඟ නැවැත්තුවා. යෙරිකෝ නගරයේ තාප්ප කඩා වැටෙන්න සැලැස්සුවා. ඔහු මුළු දවසක්ම ඉර බහින්නේ නැතුව තියෙන්නත් සැලැස්සුවා. අවුරුදු හයකට පස්සේ, ඒ දේශය කානානිවරුන්ගෙන් අල්ලාගත්තා.

යෝෂුවාගෙන් පටන්ගෙන, අවුරුදු තුන්සිය පනස්හයක් පුරා ඉශ්‍රායෙල්වරුන්ව පාලනය කළේ විනිශ්චයකරුවන්. බාරාක්, ගිඩියොන්, යෙප්තා, සම්සොන් හා සාමුවෙල් වගේ ගොඩක් අය ගැන අපි ඉගෙනගන්න යනවා. රාහාබ්, දෙබොරා, යායෙල්, රූත්, නායොමි හා දෙලීලා වගේ ස්ත්‍රීන් ගැනත් අපි කියවන්න යනවා. මේ ඔක්කොම ගත්තොත්, තුන්වෙනි කොටසේ අවුරුදු තුන්සිය අනූහයක ඉතිහාසයක් ගැන කතා කරනවා.