Na‘e taki ‘e Mōsese ‘a e kau ‘Isilelí mei he nofo pōpula ‘i ‘Isipité ki he Mo‘unga Sainaí, ‘a ia na‘e foaki ange ai ‘e he ‘Otuá kiate kinautolu ‘a ‘ene ngaahi lao. Na‘e ‘osi ha taimi pea na‘e fekau atu ‘e Mōsese ha kau tangata ‘e toko 12 ko e kau sipai ki he fonua ko Kēnaní. Ka ko e toko 10 ‘o kinautolu na‘a nau foki mai mo ha fakamatala ‘ikai ke lelei. Na‘a nau fakatupu ‘i he kakaí ‘a e loto ke nau toe foki ki ‘Isipite. Koe‘uhi ko e si‘i ‘enau tuí, na‘e tautea ai ‘e he ‘Otuá ‘a e kau ‘Isilelí ke nau fononga holo pē ‘i he toafá ‘i he ta‘u ‘e 40.

Ko hono faka‘osí, na‘e fili ‘a Siōsiua ke hoko ko e taki ‘o e kau ‘Isilelí ki he fonua ko Kēnaní. Na‘e ‘ai ‘e Sihova ha ngaahi mana ke hoko ke tokoni‘i kinautolu ke ma‘u ‘a e fonuá. Na‘á ne ‘ai ‘a e Vaitafe Sioataní ke tu‘u ‘ene tafé, holoki ‘a e ngaahi ‘ā ‘o Sielikō, pea ke tu‘u ma‘u ‘a e la‘aá he ‘aho kakato ‘e taha. ‘I he hili ‘a e ta‘u ‘e ono, na‘e fa‘ao ‘a e fonuá mei he kau Kēnaní.

Na‘e kamata ‘ia Siōsiua ‘a hono pule‘i ‘o ‘Isileli he ta‘u ‘e 356 ‘e ha kau fakamaau. Te tau ako ‘o fekau‘aki mo e tokolahi ‘o kinautolu kau ai ‘a Pēlaki, Kitione, Sēfita, Samisoni mo Sāmiuela. Te tau toe lau foki ‘o fekau‘aki mo e kau fefine hangē ko Lēhapi, Tēpola, Siāili, Lute, Nāomi mo Tilila. Ko e kotoa ‘o e Konga TOLÚ ‘oku lau ki he vaha‘a taimi ko e ta‘u ‘e 396 ‘o e hisitōliá.