Moisés katamakxtulh li Israel kʼEgipto niku kaj skujni xkatlawakanit chu kalilh ksipi Sinaí, anta niku Dios kamaxkilh xlimapakgsin. Alistalh, Moisés malakgachalh kgalhkutiy lakchixkuwin xlakata naskgalakgoy kachikin wanikan Canaán. Pero kgalhkaw tiku xkamalakgachakanit nitlan tamakatsin lichinkgolh. Tlawakgolh pi kristianos xtaspitparaputunkgolh kʼEgipto. Xlakata ni lhuwa takanajla xkgalhikgoy, Dios kamalakgaxokgelh li Israel nalatamakgoy tipuxum kata kxakaskakni tiyat.

Chalh kilhtamaku, Josué lilaksakka xlakata nakalin li Israel anta kCanaán. Jehová tlawalh laklanka tuku nilay tamakanajlay xlakata tlan xtanukgolh klaklanka kachikin. Tlawalh pi kgalhtuchokgo wanikan Jordán nialh xtlawalh, chu xpatsaps nema xlimakgstiliy Jericó kalakgsputli chu Chichini tantaku lakatum xtawi. Akxni xtitaxtunitta akgchaxan kata, Katiyatni xkamakglhtikanitta li Canaán.

Xlakkaxtlawananin takglhuwit kamapakgsiy Israel 356 kata, litsukulh Josué. Kalakgapaswi chalhuwa xlakkaxtlawananin takglhuwit, la Barac, Gedeón, Jefté, Sansón chu Samuel. Na nakatsiyaw xlakata lakpuskatin la Rahab, Débora, Jael, Noemí chu Dalila. Xliputum uma PULAKTUTU tuku lanit likgantaxtulh 396 kata.