¿KUNSA aka jaqinakax apthapisipki, uk yattati? Khunükaspas ukhamawa. Janqʼurakisä, jiskʼa laphinakar uñtatawa. Ukampis janiw khunükiti; jan ukasti manqʼañatakiwa.

Egiptot mistxapxäna uka urutxa niya mä phaxsikiw pasaskäna. Wasarankasipkänwa. Ukanxa manqʼax jukʼakïnwa, ukatwa akham parlapxäna: ‘Walikïsapänwa Jehová Diosax Egipton jiwarayistaspän ukaxa. Egiptonxa munatasarjamawa manqʼirïyätanxa’ sasa.

Ukatwa Jehová Diosax akham säna: ‘Nayasti alaxpachatwa manqʼa jalluyanï’ sasa. Ukat ukarjamaw phuqäna. Qhipärmanthixa, aka janqʼunaka uñjasaxa israelitanakax akham sasaw jisktʼasipxäna: ‘¿Akax kunasa?’ sasa.

Moisesasti akham sänwa: ‘Jehová Diosaw aka manqʼxa apayani manqʼapxañamataki’ sasa. Ukat MANÁ sasaw sapxäna. Manäxa miskʼimpi lurat tʼantʼjamänwa.

‘Qhawqtï mä jaqix manqʼaspa ukarjam apthapisipxam’ sasaw Moisesax säna. Ukatwa sapa alwax uka manqʼa apthapipxäna. Ukat luptʼanxäna ukhaxa, manäx chullurxänwa.

Moisesax akham sarakïnwa: ‘Janiw khitis arumanthitaki imañapäkiti’ sasa. Ukampisa yaqhipax janiw istʼapkänti. ¿Ukat kamachänsa? ¡Qhipürutak imat maná manqʼax laqʼuntänwa, thujstxarakïnwa!

Ukampis Jehová Diosax semanan mä uruxa payürutakiw maná manqʼxa apthapipxañama sänwa. Suxtïr urunwa uk lurapxañapäna. Ukat Jehová Diosaxa paqallq urutak imapxma, ukürux janiw kuna maná manqʼas utjkaniti sänwa. ¡Paqallq urutak imat maná manqʼaxa janiw laqʼuntkänti ni thujstkarakïnsa! ¡Akax yaqha milagrünwa!

Israelitanakax wasarankapkäna uka maranakanxa maná manqʼakwa manqʼapxäna.