Maana 34nan

Dumunifɛn sifa kura

I B’A dɔn mɔgɔw bɛ ka fɛn min cɛ duguma wa? Fɛn jɛman dɔ don. A bɔlen bɛ galasi mugumugu fɛ min bɛ to ka kɛ firigo la, nka galasi mugumugu tɛ. Dumunifɛn don.

A kalo kelen ɲɔgɔn de ye nin ye ko Israɛlkaw bɔra Misira. U bɛ kungokolon kɔnɔ. Dumunifɛn bɛrɛ tɛ falen o yɔrɔ la. Mɔgɔw dusutiɲɛnen y’a fɔ ko: ‘Hali Jehova tun ka an faga Misira! An kɔni tun bɛ dumuni min fɛ, an tun bɛ o sɔrɔ yen.’

O la sa, Jehova ko: ‘Ne bɛna dumuni jigin ka bɔ sankolo la, sanji nacogo la.’ Jehova ye o de kɛ. O dugujɛ sɔgɔma, Israɛlkaw ye o fɛn jɛman binnen ye duguma tuma min na, u ye ɲɔgɔn ɲininka ko: ‘Nin ye mun ye?’

Musa ko: ‘Jehova ye dumunifɛn min di aw ma ka a dun, o de don.’ Mɔgɔw ye a wele ko MANƐ. N’i y’a nɛnɛ, a bɛ i ko gato min dilanna ni di ye.

Musa ko: ‘Aw kelen-kelen bɛ se ka min dun ka aw fa, aw ka o hakɛ cɛ.’ Jama tun bɛ o de kɛ sɔgɔma o sɔgɔma. Ni tile ganna dɔrɔn, manɛ tɔ min tora duguma, o tun bɛ yeelen.

Musa y’a fɔ u ye fana ko: ‘Mɔgɔ si kana manɛ bila ka si walisa k’o dun o dugujɛ.’ Nka, mɔgɔ dɔw ma sɔn k’o kuma lamɛn. I b’a dɔn min kɛra wa? U tun ye manɛ min bila ka si, ntumu camanba donna o la. A tolila, k’a kasa bɔ!

Nka, Jehova y’a fɔ u ye ko dɔgɔkun kɔnɔna na, don kelen bɛ yen, u ka kan ka tile fila manɛ hakɛ cɛ min na. O tun ye tile wɔɔrɔnan ye. Jehova y’a fɔ u ye ko u ka hakɛ dɔ cɛ k’a mara o dugujɛ ɲɛ, bawo ale tɛna fɛn fosi bila k’a jigin tile wolonwulanan don na. U tun bɛ o hakɛ min cɛ k’a bila tile wolonwulan ɲɛ, ntumuw tun tɛ don o la, a tun tɛ toli, a kasa tun tɛ bɔ fana. O tun ye kabako dɔ wɛrɛ ye!

Israɛlkaw ye san minnu kɛ kungokolon kɔnɔ, olu kɔnɔna bɛɛ la, Jehova ye u balo ni manɛ de ye.

Ekisode 16:​1-36; Nɔnburuw 11:​7-9; Josue 5:​10-12.