REIKUAÁPA nde mbaʼépa ombyatyhína pe yvýgui umi hénte? Ojogua pe eládape. Morotĩ, ipererĩ ha michĩ yvyra roguéicha. Péro ndahaʼéi eláda; ko mbaʼe ikatu ojeʼu.

Ohasaramo un més rupi umi isrraelíta osẽhague Egíptogui. Oĩ hikuái pe desiértope. Upépe saʼi okakuaa hiʼupyrã, ha haʼekuéra oñemoĩ oñeʼẽ vai: ‘Iporãvevaʼerãmoʼã Jehová orejukárire Egíptope. Upépe roguerekovaʼekue tembiʼu roipotaháicha’.

Upévare Jehová heʼi: ‘Amongýta hiʼupyrã’. Ha upeichaite ojapo. Koʼẽ rire, ohechávo umi isrraelíta pe mbaʼe morotĩ hoʼavaʼekue, oñeporandu hikuái: ‘Mbaʼe piko péva?’.

Moisés heʼi: ‘Péva haʼe hiʼupyrã Jehová omeʼẽva peẽme peʼu hag̃ua’. Umi hénte ombohéra MANÁ pe tembiʼúpe. Pe maná ojogua umi tórta pererĩme ojejapóva eiretégui.

‘Pembyaty pe ikatútava peʼu’, heʼi Moisés chupekuéra. Upévare, káda pyhareve ojapo hikuái upéicha. Upe rire, ojopévo pe kuarahy, pe maná opytáva yvýpe oñepyrũ hyku.

Moisés heʼi avei: ‘Aníke avave oñongatu pe maná koʼẽrõ g̃uarã’. Péro oĩ oñongatúva. Ha ndépa reikuaa mbaʼépa oiko? Koʼẽ rire pe maná oñeñongatuvaʼekue hasopa ha oñepyrũ hyakuã vai!

Péro Jehová heʼi chupekuéra peteĩ día káda semánagui ombyatyvaʼerãha dóvle pe maná. Upéva pe sexto díape. Ha Jehová heʼi oñongatu hag̃ua hikuái pe ótro día g̃uarã, pórke ndoʼamoʼãi mbaʼeve pe séptimo díape. Oñongatúvo pe maná pe séptimo día g̃uarã, ndahasói ha nahyakuãvaíri! Upéva haʼe avei peteĩ milágro!

Entéro umi áño oiko aja pe desiértope, umi isrraelíta hoʼuvaʼekue pe maná.