WAHOTA gũtwĩra kĩrĩa andũ marongania thĩ? Nĩ ta ime. Nĩ rĩerũ na rĩgatweka ta mbaa. No ĩndĩ ti ime; nĩ kĩndũ gĩa kũrĩa.

Rĩu nĩ ta mweri ũmwe kuuma Aisiraeli moima Misiri. Marĩ werũ-inĩ. Nĩ irio nyinyi mũno ikũraga gũkũ, kwoguo andũ magĩteta makiugaga: ‘Na arĩ korũo nĩ kũragũo tworagirũo nĩ Jehova kũu bũrũri wa Misiri. Kũu twarĩ na irio ciothe cia kũhũna.’

Kwoguo Jehova agĩkiuga ũũ: ‘Nĩngũmuurĩria irio ciume igũrũ o ta mbura.’ Na ũũ nĩguo Jehova eekire. Rũciinĩ rũa mũthenya ũyũ ũngĩ rĩrĩa Aisiraeli monire tũnyamũ tũu twerũ tũgwĩte thĩ, makĩũrania o ene: ‘Ĩ nĩ kĩĩ gĩkĩ?’

Musa akĩmeera: ‘Nĩ irio iria Jehova amũhete cia kũrĩa.’ Andũ magĩciĩta MAANA. Cia camaga ta tũmĩgate tũhũthũ tũthondeketwo na ũũkĩ.

Musa akĩmera, ‘Ũnganiai o mũndũ o mũndũ o ta ũrĩa mũrĩĩre wake ũigana.’ O rũcinĩ mekaga ũguo. Rĩu ningĩ, rĩrĩa riũa rĩa hiũha, maana ĩrĩa yatigaraga igũrũ rĩa thĩ ĩgatweka.

Ningĩ Musa akiuga: ‘Mũndũ o na ũrĩkũ ndagatigie tũkinyie rũcinĩ.’ No andũ amwe matiathikĩrĩirie. Nĩ ũũĩ ũrĩa kwahanire? Rũcinĩ rũu rũngĩ maana ĩrĩa matigirie yakorirũo ĩiyũire tũgunyũ na kũnunga!

Ĩndĩ nĩ haarĩ mũthenya ũmwe thĩinĩ wa kiumia, ũrĩa Jehova eerire andũ monganie maana ya mĩthenya ĩrĩ. Ũyũ warĩ mũthenya wa gatandatũ. Jehova akiuga matigarie cia mũthenya ũcio ũngĩ, tondũ ndangĩagũithirie o na kĩ mũthenya ũcio wa mũgwanja. Rĩrĩa maatigaririe maana ma mũthenya wa mũgwanja-rĩ, kaĩ matiaiyũrirũo nĩ tũgunyũ kana kũnunga! Hĩ, gĩkĩ nĩ kĩama kĩngĩ!

Mĩaka yothe ĩrĩa Aisiraeli matũũrire werũ-inĩ Jehova aamaheaga maana.