NANCHI wayuka bintu bibena kutola babe bantu panshi nyi? Biji nobe mabebe. Byatoka ne kupela, kabiji kechi bibanda kutebauka ne. Bino kechi mabebe ne, ke kajo.

Papichiletu ñondo umo kufuma pafumijile bena Isalela mu Ijipita. Bajinga mu kiselebwa. Mu kiselebwa mwamenangatu kajo kacheche, kino kyalengejile bantu kwijizhañanya amba: ‘Yehoba inge witwipailetu monka mu Ijipita. Twajinga na kajo konse ko twakebelenga.’

Kepo Yehoba aambile’mba: ‘Nsa kukalakasha kajo kufuma mwiulu.’ Ne kya kine Yehoba wapaine kajo. Juba jalondejilepo lukelo bena Isalela byo bamwene bino bintu bitoka panshi, beipwizhe bene na bene amba: ‘Bikabye?’

Mosesa waambile’mba: ‘Kano ko kajo ko emupa Yehoba ka kuja.’ Bantu bekatelele amba MANNA. Pa kwikaja kaumvwanyikilenga nobe keke ye balenga na buki.

Mosesa waambijile bantu amba: “Muwolepo bonse au monka mwayila kuja kwanji.” Baubilenga byonkabye pa juba pa juba lukelo. Umvwe mute wazongesha, manna ashalanga panshi asungulukanga.

Kabiji Mosesa waambile’mba: ‘Kafwako ukashangapo maana kufika ku juba jikwabo ne.’ Bino bantu bamo kechi baumvwine ne. Nanchi wayuka kyamwekele nyi? Juba jalondejilepo lukelo manna o basungile abolele ne kuba mapila ne kununka!

Nangwa byonkabyo, kwajingatu juba jimo mu mulungu, Yehoba jo aambijile bantu kuwola manna a moba abiji. Jino jajinga juba ja butanu na jimo. Kabiji Yehoba wibambijile amba bafwainwe kulama kufika ne ku juba jikwabo, mambo kechi wanokeshenga manna pa juba ja butanu na bubiji ne. Umvwe basunga manna a kufikizha ku juba ja butanu na bubiji, kechi abolanga ne kwikala na mapila ne kununka ne! Kino nakyo kyajinga kya kukumya!

Moba onse bena Isalela o bajinga mu kiselebwa, Yehoba wibajishishenga manna.