KUVHURA o dimburure asi yinke vana kutoragura vantu pevhu ndi? Ayo kwa fana ngwendi yiterengenze. Yizera ntani ya naka-naka ntani usura-sura. Nye ayo kapisi yiterengenze; ayo yikulya.

Apo kwa pitire po tupu mwedi kutunda apa Vaisraeli va tundire moEgipite. Ngesi momburundu vana kara. Amo kumena nondya dononsesu tupu, makura vantu tava sivana asi: ‘Ngano Jehova kwa tu dipagerere tupu moEgipite. Amo hansa twa kere nonondya nadinye edi twa here.’

Jehova makura ta tanta asi: ‘Ngani va rokesera nondya di tuned meguru.’ Ano eyi yiyo ga rugene Jehova. Ngurangura zokukwama ko Vaisraeli tava mono yininke yoyizera yina gu, tava lipuragere asi: ‘Yisinke eyi?’

Mosesa ta tanta asi: ‘Edi yido nondya ana mu pe Jehova mu lye.’ Vantu tava yi ruku MANA. Ayo kwa tovara ngwendi mboroto va rugana nousi.

Mosesa ta tantere vantu asi: ‘Ka toreni, nkenye ogu zokuhura pahepero zendi.’ Eyi yiyo vana kurugana nkenye ngurangura. Apa nali pyapyara ezuva, mana ezi vana sigi pevhu tazi hemuka po.

Mosesa ta tanta hena asi: ‘Kwato gokupungura mana dogoro ezuva lyokusa ko.’ Nye vantu vamwe kapi vana kupurakena. Ono diva asi yinke ya horokere? Ngurangura zokukwama ko mana ezi va pungwire tazi zura maginyo, ntani tazi tameke kunuka!

Nye pwa kere ezuva limwe mosivike apa Jehova ga tanterere vantu va tore mana zokusika poyikando yivali. Eli ezuva lyountazimwe. Jehova kwa tente asi va pungwire ko zimwe ezuva lyokukwama ko, morwa kapi nga ninka mana zi gwe mezuva lyountambali. Apa va pungwire mana dogoro mezuva lyauntambali, kapi za kere nomaginyo ntani kapi za nukire! Esi naso kwa kere sitetu!

Nomvhura nadinye edi va kere Vaisraeli momburundu, Jehova kwa va rerere nomana.

Exodus 16:1-36; Numeri 11:7-9; Josuwa 5:10-12.