Chihande 34

Kulya Chachihya

UNEJIVA vyuma vanakunona vatu hamavu tahi? Vinakusoloka nge mbundu. Vitoma vyato, kaha vyaupalasese. Oloze keshi mbunduko; hivyakulya.

Kafwe hanahichi kakweji umwe kufuma haze vaIsalele valovokele muEjipitu. Vali jino mupambo. Kamwema kulya chambwendeko, shikaho vatu vanakuyayavala ngwavo: ‘Kachi tuhu Yehova atujihilile muEjipitu. Mwomwo kuze, twapwile nakulya chosena chize twasakilenga.’

Yehova jino ngwenyi: ‘Nanguminokesela kulya chakufuma mwilu.’ Yehova alingile ngocho. Lichako, chimene omu vaIsalele vamwene chuma kanechi hamavu to, valihwojwele ngwavo: ‘Echize chika?’

Mose ngwenyi: ‘Echi chikiko kulya namihane Yehova mulyenga.’ Vatu vachivulukile ngwavo MANA. Hakuchilya kwijiva nge jimbolo jajilelu jakuhaka uchi.

Mose avalwezele ngwenyi: ‘Mutu himutu akungule nge kutesa nakulya chenyi.’ Kaha muvalingilenga chimene hichimene. Hakucha chalikumbi, mana yize yasalilenga hamavu yayengunukilenga.

Mose nawa ngwenyi: ‘Mutu umwe kanda mwasezaho mana swi nakulikumbi likwavoko.’ Oloze vatu vamwe kaveshi kwivwako. Unejiva chuma nachisoloka? Lichako mana vasezangaho himavunu yavuyavu, nakunuka!

Oloze likumbi limwe muchalumingo, Yehova navalweze vatu vakungulule kulya chamakumbi avali. Eli hilikumbi lyamuchitanu nalimwe. Yehova navalweze valame nakulya chalikumbi likwavo, mwomwo keshi kunokesanga mana halikumbi lyamuchitanu naavaliko. Hakulama mana nakulikumbi lyamuchitanu naavali, mavunu pimbi nakunuka nawa chauchi! Echi hichuma chikwavo chakukomwesa!

Yehova avalishilenga vaIsalele mana hamyaka yosena vapwile mupambo.

Kulovoka 16:1-36; Kulava 11:7-9; Yoshuwa 5:10-12.