Sturka 34

Plun Satka Raya Kum

MAN nu sma upla nani tasba wina wahbi bri ba dia kan sapa? Ais baku kan. Sakuna pihni tahnta bara dus wahya lupia baku kan. Kuna ais apia kan; piaia sip dukya kan.

Israel uplika nani Idsipt wina takan ba wina kati kum baman luan kan. Bara witin nani upla iwras tasbaia ra kan. Baha ra plun wiria baman pawi kan, baha mita naku brukwi aisi bangwi kan: ‘Idsipt tasbaia ra Jehova mita wan ikan kata kau pain kaia kan. Kan baha ra yawan dia want kan ba pi kan.’

Baha mita Jehova pana win: ‘Yang kasbrika pura wina li auhwi baku plun yakabaisna.’ Bara witin baku daukan. Bara yu wala titan, Israel uplika nani ba naha dukya pihni kauhwan kan kaiki, makabi wali kan: ‘Naha na dia dukya?’

Bara Moses mita witin nani ra win: ‘Naha sika Jehova bui man nani pima wisi maiki ba.’ Bara upla nani mita nina MANNA makan. Bara auhnka ba turtia nasma wal daukan baku kan.

Sakuna Moses mita witin nani ra win: ‘Man nani piaia sma ba kat wahbi bris.’ Baha mita, titan bani wahbi kan. Sakuna yu laptika ba kau taki kan pyua ra, manna tasba ra kan ba sut slilwi lui kan.

Baha wina, Moses mita kli witin nani ra win: ‘Upla kumi sin yauhka dukyara apahki bripara.’ Sakuna kum kum ba bila walras ban apahki brin. Apahki brin taim dia takan sapa nu sma ki? Titanka wala liwa banghki taki, bisbaia man kan!

Sakuna Jehova mita win wik bila ra yu kumi baman dubil wahbi briaia sip sa. Baha ba, yu 6 ba kan. Jehova mita baku win, kan yu 7 ra, yarka manna kauhwbia apia. Bara witin nani yu 7 ba kat apahki brin taim, liwa dimras bisbaia sin takras! Naha ba sika sain wala kum kan!

Israel uplika nani ba upla iwras tasbaia ra tauki kan pyua ra manna pi kan.

Impakan sturka 16:1-36; Kulki kaikan 11:7-9; Jasua 5:10-12.