ƐBAHOLA wɔahile deɛ holɛ ko mɔɔ menli ne ɛlɛsesa ye wɔ azɛlɛ ne anwo la ɔ? Ɔle kɛ ɛbɔndwoba anzɛɛ ɛbɔlɛ mɔɔ ɛyɛ bolɔgo la. Ɔle fufule ndɛbandɛba. Noko tɛ ɛbɔndwoba ɔ; ɔle debie mɔɔ bɛdi.

Yizilayɛma vile Yigyibiti la kɛyɛ siane ko ɛ. Bɛ wɔ fienemgbole ne anu. Aleɛ biala ɛnle ɛke, ɔti menli ne dendɛle bɛ nzo abo hanle kɛ: ‘Yɛ kunlu a anrɛɛ Gyihova hunle yɛ wɔ Yigyibiti. Ɛkɛ ne yɛnyianle aleɛ biala mɔɔ yɛkpondɛ la.’

Ɔti Gyihova hanle kɛ: ‘Mebamaa aleɛ vi anwuma adɔ amaa bɛ.’ Na ɛhye yɛɛ Gyihova yɛle a. Aleɛ hyenle la Yizilayɛma ne nwunle deɛ nwonwohyee ne mɔɔ ɛdɔ ɛgua la, bɛbizebizale bɛ nwo kɛ: ‘Duzu debie ɛ?’

Mosisi zele bɛ kɛ: ‘Ɔle aleɛ mɔɔ Gyihova ɛva ɛmaa bɛ kɛ bɛli a.’ Menli ne vɛlɛle ye MANA. Ye fɛlɛko le kɛ keeki ndɛbandɛba mɔɔ bɛva wolɛ bɛyɛ la.

Mosisi hanle hilele menli ne kɛ: ‘Awie biala ɛsesa dɔɔnwo biala mɔɔ kɛza ye di la.’ Ɔti nwonlomɔ biala bɛsesale bie. Na saa ewia ne fi kpole a ɛnee mana ne mɔɔ hale azɛlɛ ne anwo la ɛholo.

Eza Mosisi hanle hilele bɛ kɛ: ‘Awie biala mmafa bie sie ɔmaa aleɛ kye zolɛ.’ Noko bie mɔ andie. Ɛze mɔɔ zile a? Aleɛ hyenle la mana ne mɔɔ bɛvale bɛziele la lɔle azonlɛ, na ɔbɔle ɔ bo kɛ ɔbɔ!

Noko akee, kenle ko wɔ dapɛne ne anu mɔɔ Gyihova hanle hilele menli ne kɛ bɛsesa mana ne mɔnwo. Yemɔ a le kenle ne mɔɔ tɔ zo nsia la. Gyihova hanle hilele bɛ kɛ bɛva bie bɛzie, ɔluakɛ ɔnrɛmaa bie ɛnrɛdɔ kenle ne mɔɔ tɔ zo nsuu la. Mekɛ mɔɔ bɛvale mana ne bie bɛziele la yeannɔ azonlɛ yɛɛ yeambɔ noko! Ɛhye le nwanwane debie bieko!

Ɛvolɛ mɔɔ Yizilayɛma lile wɔ fienemgbole ne anu la amuala Gyihova manle bɛ mana manle bɛlile.