Relato 34: Un Kuminda Nobo
BO SA ta kiko e hendenan ta piki for di suela? E ta parse sneu. E ta blanku i fini manera skama di piská. Pero no ta sneu, e ta algu pa kome.
Ta rònt di un luna so a pasa desde ku e israelitanan a sali for di Egipto. Nan ta den desierto. Masha poko kuminda ta krese ei, i p’esei e pueblo ta keha, bisando: ‘Mihó Yehova a mata nos den Egipto. Ei por lo ménos nos tabatin kuantu kuminda ku nos tabata ke.’
P’esei Yehova a bisa: ‘Mi ta bai hasi kuminda kai for di shelu.’ I esei ta loke Yehova a hasi. Su manisé ora ku e israelitanan a mira ku e tera tabata kubrí ku algu blanku, nan a puntra otro: ‘Kiko esei ta?’
Moisés a bisa: ‘Esei ta e kuminda ku Yehova a duna boso pa kome.’ E pueblo a yam’é MANA. El a smak manera buskuchi trahá ku miel.
Moisés a bisa e pueblo: ‘Boso tin ku piki nèt loke kada persona por kome.’ P’esei tur mainta esei ta loke nan a hasi. Anto, ora ku solo tabata bira kayente, tur mana ku a sobra riba tera tabata dirti.
Moisés a bisa nan tambe: ‘Ningun hende mag warda mana te e siguiente dia.’ Pero algun hende no a skucha. Bo sa kiko a sosodé? Su manisé e mana ku nan a warda tabata yen di bichi, i a kuminsá hole malu!
Sin embargo, tin un dia di siman ku Yehova a bisa e pueblo pa rekohé dòbel e kantidat di mana. Esei tabata e di seis dia. Anto Yehova a bisa nan pa warda un tiki mana pa e siguiente dia, pasobra lo e no a laga ningun mana kai e di shete dia. Ora nan a warda mana pa e di shete dia, e no a yena ku bichi i no a hole malu! Esei ta un otro milager!
Tur e añanan ku e israelitanan tabata den desierto, Yehova a duna nan mana pa nan kome.
Eksodo 16:1-36; Numbernan 11:7-9; Josué 5:10-12.
Pregunta
- Kiko e hendenan riba e plachi ta piki for di suela, i kon yama e kos ei?
- Ki òrdu Moisés ta duna e hendenan tokante pikimentu di mana?
- Kiko Yehova a manda e pueblo hasi riba e di seis dia, i dikon?
- Ki milager Yehova a hasi ora e hendenan a warda mana pa e di shete dia?
- Pa kuantu tempu Yehova a keda alimentá e pueblo ku mana?
Preguntanan adishonal
- Lesa Eksodo 16:1-36 i Numbernan 11:7-9.
Kon Eksodo 16:8 ta mustra ku ta importante pa nos respetá nombramentu teokrátiko den e kongregashon kristian? (Heb. 13:17)
Den desierto, kiko a pone e israelitanan keda kòrda diariamente ku nan tabata dependé di Yehova? (Eks. 16:14-16, 35; Deu. 8:2, 3)
Ki nifikashon simbóliko Hesus a apliká na mana, i kon nos ta benefisiá for di e “pan di shelu” aki? (Juan 6:31-35, 40)
- Lesa Josué 5:10-12.
Pa kuantu aña e israelitanan a kome mana, kon esaki a pone nan na prueba i kiko nos por siña for di e relato aki? (Eks. 16:35; Num. 11:4-6; 1 Kor. 10:10, 11)
