34 yachachiy

Musuq mikhuna

¿YACHANKICHU imatachus kay runas jallpʼamanta pallachkanku? Ritʼiman rikchʼakun. Yuraq, sillpʼita, juchʼuy llaqhijina kasqa. Mana ritʼichu, manaqa mikhuna.

Israelitakuna Egiptomanta lluqsisqankumanta juk killallaraq karqa. Paykuna chʼin pampapi tiyakuchkarqanku. Chaypiqa mana achkha mikhuna karqachu. Chayrayku jinata thutuyta qallarirqanku: ‘Astawan allin Egiptopi Jehová wañurachinawayku kaman karqa. Chaypi munasqaykuta mikhuq kayku’, nispa.

Chayrayku Jehová nirqa: ‘Ñuqa mikhunata patamanta qamkunapaq parachimusaq’, nispa. Chaytataq ruwan. Qʼayantin sutʼiyaymanta israelitakuna yuraqllata rikuspa tapukunku, ¿imataq kayri?, nispa.

Moisestaq nirqa: ‘Kay mikhunata, Jehová mikhunaykichikpaq qusunkichik’, nispa. Runa kay mikhunata MANÁ nispa suticharqa. Maná nisqaqa miskʼiyuq tʼantajina karqa.

Moisés runaman nirqa: ‘Sapa jukniykichik pallakuychik machkhatachus mikhunaykichikpaqjina’, nispa. Runataq sapa pʼunchay chayta ruwarqa. Chaymanta maná nisqaqa Intiwan chinkakapuq.

Moisés nillarqataq: ‘Ama manata qʼayantinpaq puchuchinkichikchu’, nispa. Wakinkunaqa puchuchirqanku. ¿Imatataq puchuchisqanku ruwakun? Qʼayantinpaq maná nisqaqa asnaspa khuruykakapuq.

Jehová israelitakunata suqta kaq pʼunchaypi, qʼayantinpaq ima uqharinankuta nirqa. Imaraykuchus qanchis kaq pʼunchayqa mana imapis janaqpachamanta urmamunanchu karqa. Qanchis pʼunchaypaq manata jallchʼaptinku, mana khuruykuqchu nitaq asnaykuqchu. ¡Chaypis juk milagrollataq karqa!

Israelitakuna chʼin pampapi kachkaspa tukuy tiempo maná nisqata mikhurqanku.

Éxodo 16:1-36; Números 11:7-9; Josué 5:10-12.