¿LA AWETAʼM su tijan kkesikʼ ri täq winaq? Kawil at junam che saqbʼach. Saq kkaʼyik xuqujeʼ kokʼ. Wariʼ saqbʼach täj; wariʼ ktijowik.

E kʼownaq kebʼ oxibʼ qʼij che e elenaq pa Egipto, ri täq israelitas e kʼo pa ri chaqiʼj ulew. Chilaʼ kuya ta uwäch täq tikoʼn, rumal wariʼ xeʼok che ubʼixik: ‹Are utz wat Jehová xojukamsaj chilaʼ Egipto. Chilaʼ kqatijo ronojel su kqaj›.

Rumal wariʼ xubʼij Jehová: ‹Kintaq bʼi ri wa junam rukʼ jun jabʼ›. Are kʼut xubʼano. Chiʼ xsaqarik ri israelitas xkil wariʼ, tekʼuriʼ xkebʼij: ‹¿Su wariʼ?› Xechaʼ.

Moisés xubʼij wariʼ chike: ‹Are wariʼ ri wa xutaq lo Jehová chiwe rech kitijo›. Ri winaq xkebʼij MANÁ che wajun wa. Ri maná xa junam rukʼ utijawik kaxlanwa rukʼ kabʼ.

‹Chisikʼaʼ rech kikʼolo jumpa kitijo›, xchaʼ Moisés chike ri winaq. Rumal wariʼ, ronojel qʼij chiʼ ksaqarik, keʼok che umolik ri kiwa. Tekʼuriʼ chiʼ ri Qʼij kmiqʼik (kmeʼek), ronojel ri maná che kʼo kan cho rulew kjaʼrik. Xuqujeʼ ri Moisés xubʼij: ‹Nijun kkunik kukʼol uwa rech kebʼ qʼij›. E kʼo nikʼaj che xkekʼol kiwa rech kebʼ qʼij.

¿La awetaʼm su xubʼano? ¡Chiʼ xsaqarik ri jun chik qʼij, ri maná kkekʼolon kanoq xenoj che ixjut (amolo) tekʼuriʼ xubʼan chu!

Ri Jehová xubʼij che rajawaxik che jun qʼij pa semana, kkemol kiwa rech kebʼ qʼij. Are ri uwaq (sexto) qʼij kbʼan wariʼ, rumal che ri uwuq o séptimo qʼij kʼot maná. ¡Chiʼ kkekʼol kan kiwa rech ri uwuq qʼij, kʼot kepe ixjut che xuqujeʼ kubʼan ta chu! ¡Wariʼ xa jun chik etal!

Pa kawinaq (40) junabʼ, ri israelitas xketij ri maná pa chaqiʼj ulew.