¿YACHANKICHU imatataq runakunaqa pampamanta hoqarikuchkanku? Qasamanmi rikchakun. Lasta hina yuraqcha hinaspa llaspachalla kasqa. Ichaqa manam qasachu; chayqa mikunapaqmi.

Egipto nacionmanta lloqsimusqankumantaqa yaqa killa masña pasarun. Chunniqpim kachkanku. Chaypiqa manam kawsayqa wiñanchu, chaymi quejakurqaku kaynata nispa: ‘Allinchá kanman karqa Egipto nacionpiraq Jehová Dios wañurachiwaptinchikqa. Chaypiqa saksananchikkamam mikukuq karqanchik’ nispa.

Chaymi Jehová Diosqa nirqa: ‘Parata hinam cielomanta mikuyta chayachipamusqaykichik’ nispa. Hinaspa chaynatamá rurarqa. Paqarinnintinta Israel runakuna chayta qawaspanku ninakurqaku: ‘¿Imataq kayqa?’ nispa.

Hinaptinmi Moisesqa nirqa: ‘Kayqa mikunaykichikpaq Jehová Diospa qosusqaykichik mikuymi’ nispa. Runakunaqa MANÁ nispam suticharurqaku. Chay mikuyqa mielniyoq galleta hina miskillañam karqa.

‘Huñuychik sapakama mikunaykichikpaq kamaqta,’ nispam Moisesqa runakunata nirqa. Sapa madrugawmi chaynata ruraqku. Hinaptinmi puchuqninñataq Intipa rupayninwan chullururqa.

Chaymi Moisesqa nirqa: ‘Kay mikuytaqa amam paqarinpaqqa mayqannikichikpas puchuchinkichikchu’ nispa. Wakinninmi ichaqa puchururqaku. Hinaptinqa ¿imataq pasarqa? ¡Paqarinnintinkama puchusqankuqa ururuspam asnarirusqa!

Jehová Diosqa soqta kaq viernes punchawta huk chaynatawanraq huñunankupaqmi nirqa. Nirqataqmi puchuqtañataq waqaychaychik paqarinpaq, qanchis kaq sabado punchawpiqa manam imapas kanqachu nispa. ¡Maná nisqa sutiyoq mikuyta sabadokama waqaychaptinkuqa manam ururunpaschu nitaq asnarinpaschu! ¡Kaypas milagrom!

Chunniqpi 40 wata purisqankupim Israel runakunaqa maná nisqa sutiyoq mikuyta mikurqaku.