Tantara 34

Hany Vaovao

INO va raha timpònin’olo eto reo? Fotifoty noho manify sady boribory, atao ho fanala io raha io. Fe tsy fanala raha reo, fa raha fihàny.

Voho vola raike zay ty nialàn’Israelita reo ta-Ejipta tao. An’efitsy ane roze henany zao. Kelikele avao ty hany nitìry tany, ka nitarày ty olo hoe: ‘Aleonay novonòn’i Jehovah ta-Ejipta tany. Laha mba tany moa zahay, le nahazo ze hany teanay.’

Ka hoy Jehovah hoe: ‘Handatsake hany baka an-danitse ane aho.’ Nanao raha zay vatane Jehovah. Hamarain’iny, laha fa nahita raha fotifoty nilatsake Israelita reo, le samby nifampanontany hoe: ‘Ino retoa io?’

Nivòla Mosesy hoe: ‘Io ty mofo namean’i Jehovah hohaninareo.’ MANA ro nikaìhan’olo aze. Atao ho mofo mamy, nasia tantely io ty tsirone.

‘Afake mangalake ze ho lanine iaby ty olo kiraidraike’, hoy Mosesy. Ka le zay vatane ty nataon-droze saky maray. Fe, laha fa nanomboke mafana ty andro le tsy hita tamy tany eo sasy mana reny.

Nivòla kea Mosesy hoe: ‘Tsy tokone hajarìnareo amy andro manarake mana io.’ Fe nisy avao ty olo tsy nijànjy safàn’i Mosesy zay. Ka ino ty raha niseho? Laha fa hamaray maraindray, le nifeno holitsy, sady nanomboke nimantsy mana najarìn-droze reny!

Fe nisy andro raike tamy herinandro nivolànin’i Jehovah tamin’Israelita reo mba hangalake mana ho ampy an-droze anaty ty roe andro. Andro fahaeny andro io. Nivòla tamin-droze Jehovah mba hanajàry mana io ho amy andro manarake, satria fa tsy hampilatsake mana sasy ie amy andro fahafito. Ka laha fa najarìn-droze mana io tamy andro fahafito, le tsy niterake holitsy noho tsy nimantsy mihitsy! Fahagagà hafa kea zay!

Mana avao ty hany namean’i Jehovah Israelita reo, tamy fotoa nipetràhan-droze tan’efitsy tany.

Eksodosy 16:1-36; Nomery 11:7-9; Josoa 5:10-12.