YU KAN fruteri san den sma e piki na tapu a gron? A fini leki weti sukru. A de wan sani fu nyan.

A de wan mun so, sensi den Israelsma ben gowe libi Egepte. Den de na ini a sabana now. Furu nyanyan no e gro dya. Fu dati ede a pipel e krutukrutu. Den e taki: ’Wi ben winsi taki Yehovah ben kiri wi na Egepte. Awansi fa a no fa, drape wi ben abi ala nyanyan di wi ben wani.’

Fu dati ede Yehovah e taki: ’Mi o meki nyanyan fadon komoto na loktu.’ Na dati Yehovah e du tu. A tamara mamanten fu en te den Israelsma e si a weti sani disi di fadon, den e aksi makandra: ’San na disi?’

Moses e taki: ’Disi na a nyanyan di Yehovah gi unu fu nyan.’ A pipel e kari en MANA. A e tesi leki plata kuku di meki nanga oni.

’Un musu piki someni leki ibri sma kan nyan’, Moses e taigi a pipel. Disi na san den e du ala mamanten. Dan te a son e kon hati, a mana di ben tan na gron e smèlter.

Moses e taki tu: ’Nowan sma mag kibri wan pikinso fu a mana te na a tra dei.’ Ma sonwan fu den sma no e arki. Yu sabi san e pasa? A tamara mamanten a mana di den kibri e lai nanga woron. A e bigin tingi!

Ma wán dei fu a wiki de, di Yehovah e taigi den sma fu piki tu tron someni mana. Disi na a di fu siksi dei. Yehovah e taki fu kibri pikinso fu a mana gi a tamara fu en, bika a no sa meki noti fadon na a di fu seibi dei. Te den kibri a mana kon miti a di fu seibi dei, dan a no e lai nanga woron. A no e tingi tu! Disi na wan tra wondru!

Ala den yari di den Israelsma de na ini a sabana, Yehovah e gi den mana fu nyan.