Makani 34: Musyobo Mupya Wacakulya
HENA ulicizyi bantu ncobagoma ansi? Cili mbuli caanda. Cilatuba bu. Cili papalede alimwi cikomoka buyo. Pele tacili caanda pe, ncakulya.
Kwainda buyo mazuba aatandila kumwezi omwe bana Isilayeli nibakazwa ku Ijipiti. Bali munkanda. Zyakulya zikomena mubusena oobu ziniini, aboobo bantu balatongooka kabati: ‘Nicakabota Jehova naakatujaya buyo mu Ijipiti. Mbubo kwalo twakalijisi misyobo yoonse yazyakulya nzyotwakali kukonzya kulya.’
Aboobo Jehova wati: ‘Ndilacita kuti cakulya ciloke kuzwa kujulu.’ Oobu mbombubo Jehova mbwaacita. Nibwakaca, bana Isilayeli nibakabona cintu cituba cakaloka ansi, bakatalika kubuzyanya ategwa: ‘Nobantu, ino ncinzi eeci?’
Musa wakati: ‘Eeci ncilyo Jehova ncaamupa kuti kamulya.’ Bantu bakacuulika kuti MANA. Cilaamunse mbuli watunkwa twapangizyigwa abuci.
Musa wakaambila bantu kuti: ‘Muntu amuntu agome ngakonzya kumana kulya.’ Aboobo abuzuba ngowakali ngomulimo. Ikuti zuba lyabala, mana aacaala akali kunyenguluka.
Alimwi Musa wakati: ‘Taku weelede kuyobola mana aakuti akalye buzuba buccilila.’ Pesi bamwi tabamvwi. Hena ulicizyi cakali kucitika? Bwaca buyo, mana ngobakayobola akali kuba amvwunyu akutalika kununka.
Nokuba boobo, kwakali buzuba bomwe Jehova mbwaakali kubaambila kwiindilizya kugoma mana. Oobu mbuzuba bwacisambomwe. Alimwi Jehova wati kuyobolwe aamwi aabuzuba buccilila, nkaambo taku mana ngaya kulosya mubuzuba bwaciloba. Nibakali kuyobola mana aakuya kulya mubuzuba buccilila bwaciloba, taku naakali kuba amvwunyu akutalika kununka. Aalo aaya maleele nsini!
Yoonse myaka bana Isilayeli njibali munkanda, Jehova wali kubasanina amana.
Kulonga 16:1-36; Myeelwe 11:7-9; Josyuwa 5:10-12.
Mibuzyo
- Ncinzi acifwanikiso bantu ncobagoma ansi, alimwi ciitwa buti?
- Ino malailile nzi Musa ngaabapa bantu mbuli mbobeelede kugoma mana?
- Ncinzi Jehova ncaakaambila bantu kucita mubuzuba bwacisambomwe, alimwi nkaambo nzi?
- Ino maleele nzi Jehova ngacita ikuti mana ayobolwa kwaakusika mubuzuba bwaciloba?
- Cakatola ciindi cilamfwu buti Jehova kabasanina mana bantu bakwe?
Mibuzyo aimwi
- Bala Kulonga 16:1-36 a Myeelwe 11:7-9.
Mbuti Kulonga 16:8 mbwatondezya mbuli mbociyandika kuli ndiswe kupa bulemu kububambe bwakusala baalu bucitwa mumbungano ya Banakristo bweendelezyegwa a Leza? (Heb. 13:17)
Nkuyeekezyegwa kuli buti bana Isilayeli nibakali munkanda nkobakali kuyeekezyegwa abuzuba kutegwa kabasyoma buyo Jehova? (Kul. 16:14-16, 35; Dt. 8:2, 3)
Ncikozyanyo nzi Jesu ncaakapa kucilyo camana, alimwi nimpindu nzi njotujana ‘kunsima iizwa kujulu’? (Joh. 6:31-35, 40)
- Bala Josyuwa 5:10-12, BT.
Kwakainda myaka yongaye bana Isilayeli kabalya mana? Alimwi akajisi munse uuli buti? Aboobo ncinzi ncotukonzya kwiiya kucibalo eeci? (Kul. 16:35; My. 11:4-6; 1 Kor. 10:10, 11)
