Mwaha 34: Muthinto Musyaa Wa Yoolya
NYUWO munniwerya ohimya yeeyo atthu awo enittotta aya vathii? Enikhala ntoko maralala. Ti yootteela, yooyeva ni yoopepheruwa. Masi khahiyo maralala; etthu enilyiwa.
Ovinre mweeri mmosaa paahi okhuma vaavale anaIsarayeli vaakhumme aya wEjiitu. Awo arisa mothakoni. Mu munimela soolya vakhaani, tivonto atthu awo vaninlaseya aya, ariki: ‘Fataari Yehova aaniivale wEjiitu. Iwe nto naahikhalana yoolya yotheene yaaphavela ahu.’
Siiso Yehova aahihimya wira: ‘Kinimwiiriha yoolya omorela vathii ekhumaka musuluu.’ Ela ti etthu yeeyo Yehova enipaka awe. Mmeeloni mwaya voosiisu vaavo anaIsarayeli voonalya aya etthu ela yootteela yaamonre, awo annikohana mukina ni mukhw’awe ariki: ‘Exeeni ela?’
Moise onihimya wira: ‘Ela yoolya yeeyo Yehova yoovanhaaweni wira mulyeeke.’ Atthu awo aniihana ela okhala EMANAA. Esivelo aya enikhala ntoko mikatthe saamukhaani sipakiwe ni maasi enuyi.
‘Khuta mutthu a nyuwo ottotteke eniwerya awe olya,’ Moise onnaaleela atthu awo. Siiso khuta voosiisu ela etthu yeeyo enipaka aya. Nuumala vo, vaavo nsuwa vaniviha aya, emanaa yaahiiwale vatthayani ennitothowa.
Moise nave-tho onihimya wira: ‘Ohikhale mutthu mmosaa onsuka emanaa ela mpakha mmeeloni mwaya.’ Masi atthu akina khaniiwelela. Nyuwo munnisuwela eniiraneya? Mmeeloni mwaya voosiisu emanaa yeeyo awo yaasunke aya enisareya myunku, ni ennipacerya wunkha!
Hataa vari siiso, nookhala nihiku nimosaa vasumanani, nenno Yehova nnaahimeerya awe atthu wira attotteleke emanaa miphimo miili. Nna nrii nihiku na neethanu na mmosaa. Nto Yehova aahaaleela wira asukeke vakhaani mpakha mmeeloni mwaya, okhala wira owo khonrowa omoroxa nihiku na neethanu na nenli. Vaavo awo vanisuka aya emanaa mpakha nihiku na neethanu na nenli, ela khenikhumela myunku ni kheninkha! Ola mutikiniho mukinaku!
Iyaakha sotheene seiyo anaIsarayeli arya aya mothakoni Yehova onnaalyiha ni emanaa.
Okhuma 16:1-36; Mothakoni 11:7-9; Yoxuwa 5:10-12.
Makoho
- Valataratoni va, exeeni atthu enittotta aya vathii, ni ela eniihaniwa sai?
- Malakiheryo xeeni Moise onaavaha awe atthu voohimya sa ottottela emanaa?
- Exeeni Yehova enaaleela awe opaka atthu mu nihiku na neethanu na mmosaa, ni nthowa xeeni?
- Mutikiniho xeeni Yehova onipaka awe vaavo emanaa vanisukiwa aya mpakha nihiku na neethanu nenli?
- Iyaakha kavii Yehova onaalyiha awe atthu ni emanaa?
Makoho oowuncererya
- Mmusome Okhuma 16:1-36 ni Mothakoni 11:7-9.
Okhuma 16:8 onooniherya exeeni voohimya sa otthuneya waya wa hiyo ottittimiha soothanleliwa soomuluku mmulokoni mwa eKristau? (aHeb 13:17)
Mothakoni, moota xeeni anaIsarayeli yuupuxeriwa aya khuta nihiku olipana waya ni Yehova? (Okhum 16:14-16, 35; Otum 8:2, 3)
Nthoonyeryo xeeni na emanaa Yesu naavanha awe, nto ninttottela sai mureerelo sa ‘ephaawu [ela] erwiiye wirimu’? (Yon 6:30-35, 40)
- Mmusome Yoxuwa 5:10-12.
AnaIsarayeli yaalyiiye emanaa iyaakha kavii, moota xeeni ela yaaweeherenrya aya awo, ni exeeni eniixutta ahu mu yoohimya ela? (Okhum 16:35; Moth 11:4-6; 1 aKor 10:10, 11)
