EPE EPU küyen wüla tripalu pu Israel che Egipto mu, puwi engün Sinay fütra wingkul mew, Oreb ka pingelu. Feychi mapu mew Jewba dungufi (dungulfi) ta Moyse, kiñe pichi anümka lululkülelu kütral mew. Kom Israel che lelfün mu umakey (umañkey) engün. Mülepuy engün epe kiñe tripantu mu.

Tati pu che petu üngümküleyngün (üngelküleyngün) nagaltu mu, Moyse püray ti fütra wingkul mew. Üye mew Jewba feypifi ta Moyse: ‘Iñche ayüafun ti pu Israel che ñi feyentuaetew, ka tañi sakin pu che ngerpual.’ Nagpalu Moyse, feypifi pu Israel che chem Jewba ñi feypiel. Ka ti pu che feypingün: ‘Feyentuafiyiñ (müngeltuafiyiñ) Jewba,’ ayüyngün am ñi sakin pu che ngeal.

Fewla, Jewba femi kiñe afmatufal dungu. Femi ti wechun wingkul mu püray fitrun ka fütrake tralkan. Kafey dungufi tati pu che, ka feypifi: ‘Iñche ta Jewba tami Ngünechen mi entuetew Egipto mapu mew.’ Feymu elufi tüfachi werkün dungu: ‘Mülelay tami poyeal kake dio, iñche ta poyean müten.’

Ngünechen wüli pu Israel che ka aylla werkün dungu, ka ley dungu. Ti pu che rume llükaleyngün. Feypifingün ta Moyse: ‘Eymi dunguñpemuyiñ, llükaleyiñ dungueliyiñmew Ngünechen, layaiñ.’

Fey wüla Jewba feypifi ta Moyse: ‘Pürapange tüfa ti fütra wingkul. Iñche eluaeyu epu llingüd kura, chew wirintükufiñ tati ley dungu ayün ti pu che ñi feyentual.’ Fey mew Moyse ka kiñe rupa püratuy ti fütra wingkul. Meli mari antü ka meli mari pun mülepuy üye mew.

Rume fentren ley dungu niey Chaw Ngünechen ñi pu che. Moyse wirintükufi. Chaw Ngünechen ka elufi ta Moyse ti epu llingüd kura. Tüfa epu kura, Ngünechen ta wirintükuy ti mari ley dungu ñi dew dungufiel kom pu che. Mari Werkün Dungu pingelu.

Tüfachi Mari Werkün Dungu fey falin-ngechi ley dungu tati. Welu ka falin-ngey kake fentren ley Ngünechen elufi tati pu Israel che. Kiñe feypi: ‘Müley tami piwkeyeafiel Jewba tami Chaw Ngünechen kom tami piwke mu, kom tami rakiduam mu, kom tami mongen mu, ka kom tami newen mu.’ Kangelu feypi: ‘Müley tami piwkeyeafiel tami chafche chumngechi piwkeyeniewimi ta eymi.’ Chaw Ngünechen ñi Fotüm, Jesukristo, feypi tüfa feyta epu doy falin-ngechi ley dungu Ngünechen elufi tañi pu che, Israel. Fey wüla kimafiyiñ fentren dungu Ngünechen ñi Fotüm ka ñi pu kimeltun.