Jehova ye a ka sariyaw di
Maana 35nan
Jehova ye a ka sariyaw di
A KALO fila ɲɔgɔn de filɛ nin ye ko Israɛlkaw bɔra Misira. U sera kulu dɔ la min bɛ wele ko Sinayi, walima ko Horɛb. O yɔrɔ kelen de la Jehova tun kumana Musa fɛ jiritu dɔ la, tasuma tun bɛ min na. Jama ye waati dɔ kɛ yen.
Musa yɛlɛnna tuma min na ka taa kulu kunna, jama tora kulu sen kɔrɔ, ka Musa makɔnɔ. Jehova y’a fɔ Musa ye ko Ale b’a fɛ Israɛlkaw ka Ale kan minɛ, ka kɛ Ale ka jamakulu kɛrɛnkɛrɛnnen ye. Musa jiginnen ka bɔ kulu kunna, a ye Jehova ka kumaw lase Israɛlkaw ma. Israɛlkaw y’a fɔ ko Jehova ye min fɔ, u bɛna o kɛ, bawo u b’a fɛ ka kɛ Jehova ka jamakulu ye.
Jehova ye kabako dɔ kɛ sisan. Kulu sanfɛla bɛɛ kɛra sisi ye ani sanpɛrɛnkanba fana bɔra. A y’a fɔ fana mɔgɔw ye ko: ‘Ne ye Jehova i ka Ala ye, min ye i labɔ Misira.’ A tilala ka nin ci fɔ: ‘I kana ala wɛrɛ bato ni ne kelenpe tɛ.’
Ala ye cikan walima sariya kɔnɔntɔn wɛrɛw di Israɛlkaw ma. Israɛlkaw siranna kosɛbɛ. U y’a fɔ Musa ye ko: ‘E ka kuma an fɛ, bawo ni Ala kumana an fɛ, an bɛ siran an kana na sa.’
Kɔfɛ, Jehova y’a fɔ Musa ye ko: ‘Yɛlɛn ka na ne fɛ kulu kunna. Ne ye sariyaw sɛbɛn kabakurun pɛnpɛrɛnnen fila minnu kan, ne bɛna olu di i ma, bawo ne b’a fɛ jama ka o sariyaw mara.’ O la sa, Musa yɛlɛnna kokura kulu kan. A tora o yɔrɔ la tile 40 ni su 40.
Ala ye sariya camanba di a ka jamakulu ma. Musa ye o sariyaw bɛɛ sɛbɛn. Ala tun ye sariya 10 minnu fɔ mɔgɔw ye, ale yɛrɛ tilala k’olu sɛbɛn kabakurun pɛnpɛrɛnnen fila kan, ka o kabakurun fila fana di Musa ma. O sariya tan bɛ wele ko Cikan Tan.
O Cikan tan ye sariyaw ye minnu nafa ka bon. Nka, Ala ye sariya tɔ minnu di Israɛlkaw ma, olu fana nafa ka bon. O sariyaw dɔ la kelen ye ko: ‘I ka kan ka Jehova i ka Ala kanu ni i dusukun bɛɛ ye, ani ni i hakili bɛɛ ye, ani ni i ni bɛɛ ye, ani ni i fanga bɛɛ ye.’ Sariya dɔ wɛrɛ fana b’a fɔ ko: ‘I ka kan ka kɛ i mɔgɔɲɔgɔn fɛ i ko i yɛrɛ.’ Ala Denkɛ Yesu y’a fɔ ko Ala ye sariya minnu di a ka jamakulu ma, olu la, o sariya fila de ye sariyaw bɛɛ la belebele ye. An bɛna fɛn caman kalan Ala Denkɛ ni a ka kalansiraw kan kɔfɛ.
Ekisode 19:1-25; 20:1-21; 24:12-18; 31:18; Dutɛrɔnɔmɛ 6:4-6; Levitike 19:18; Matiyu 22:36-40.
