Abahüdaguni 35

Lilurudun Heowá

KÉIBURI bián hati lárigiñe háfuridun ísüraelina Ehiptugiñe, aba hachülürün luagu wübü Sinaí, Orebü giñe lagúahoun lun. Ñein ladimureha Bungiu lun Moisesi lídangiñe aban búbugati durungu. Aba hemeraagun sun gürigia ani redeitiña ñein luagu somu dan.

Dan le añahagua lan sun gürigia agurabaha ǘnabu, aba lawarirun Moisesi luagun wübü. Ñein, aba lariñagun Heowá lun Moisesi busén lan lun gaganbadi hamá ísüraelina lun ani hagíaba lan lumutuniña espechalitiñu. Dan le lararirun Moisesi, aba lariñaguni houn ísüraelina le lariñagubei Heowá. Ábati hariñagun gürigia gaganbadibaña lan lun Heowá, ladüga busentiñu lumutuniña hamá.

Guentó adügati Heowá aban katei ámuti. Adügati lun liñurun gumuleli, luma lun ñein lan wayuhururu le héreti. Adimurehati giñe houn lumutuniña ani ariñagati houn: ‘Au Heowá le Bubungiute le asagarubalibu Ehiptugiñe.’ Ábati líchiguni gumadi le houn: ‘Máhuduraguaba houn amu búngiugu nuéi.’

Ruti Bungiu houn ísüraelina nefu amu gumadi, o lúrudu. Wéiriti hanufude gürigia. Aba hariñagun lun Moisesi: ‘Buguyalá adimureha woun, ladüga hanufudetiwa anhein lan adimureha Bungiu woun wóunweguba.’

Lárigiñe, aba lariñagun Heowá lun Moisesi: ‘Wariba ñahoun luagun wübü. Níchugüba biama dübü fadati le ñein lubéi nabürüdei lúrudu burí le nabusenrubei hadügüni numutuniña.’ Ábaya lawarirun Moisesi luagun wübü. Aba lerederun ñein 40 weyu luma 40 áriebu.

Anihein bandi lúrudu luma Bungiu houn lumutuniña, Moisesi abürühabani. Ru lumuti giñe Bungiu bián dübü fadati lun Moisesi. Luagu, labürühei Bungiu guánarügü diisi lúrudu le adimureha laalibei houn sun lumutuniña. Diisi Gumadi líribei.

Diisi Gumadi le, lúrudu burí súdiniti. Gama lumoun súdiniti giñe saragu amu lúrudu le líchugubei Bungiu houn ísüraelina. Anihán aban lídangiñe: ‘Hínsiñela Heowá le Bubungiute bun tau sun banigi, lau sun bisaminan, tau sun buani, luma lau sun bere.’ Anihán le aban: ‘Hínsiñe hamá bíbirigu bun kei bínsiñegua bungua.’ Ariñagati Hesukrístu, le Liráü Bungiu, anihán lan biama gumadi le wéirigutimabei lidan lilurudun Bungiu le líchugubei houn lumutuniña Ísüraeli. Lárigiñe wafurendeiruba saragu katei luagu Liráü Bungiu luma le larufudahabei.

Áfuriduni 19:1-25; 20:1-21; 24:12-18; 31:18; 2 Lúrudu 6:4-6; Fádirigu 19:18; Matéu 22:36-40.