NII warbo gussaar Egiptog nosad sorbali, Israel dulemar Sinaí yarse owarmasmala, we yar Horebye bilebali. We yargi Jehová, Moisésga gagan darbali sunmasa. Bela neggwebur wegi anbaggunoniggi, geb issesaar gudigusmala.

Moisés yarbirse naggwisgua, neggweburdina urba abiddobuggwa. Degine Jehová, Moisésga soge, Israel dulemar E sogedba damalad abeye geb E neggweburga gumalad. Moisés agdeargua, Jehová ibmar sogsad Israel dorganga bela sognoniggi. Geb bela sogmala Jehová sogedba damaloye, ar e neggweburga gubimalad.

Jehová emisgindi ibmar geger dagleged imasa, yar birgi waa agnaggweg imasa, geb imasbali mar dummagan goledi. Degine neggweburga sunmasbali geb emarga soge: ‘Ani an Babdummad Jehová, Egipto neggweburgi bemar onosadi’. Geb emarga we igar ugsa: ‘Mer ibmar baigan na babdummadga imagmalo, unnila an sebii gormalo’.

Babdummad Israel dorganga bamalad igar sogbaggebag ugsabali. Neggwebur belabela dobed. Moisésga sogmala: ‘Bur be anmarga sunmagge, ar anmar dobe iddoge, abaggar Babdummad anmarga sunmaggalir anmar burgwidele’.

Beedse gine, Jehová, Moisésga soggarbali: ‘Yarbirse be nagbali. An beg aggwa maddargwagwad gwabogwa uggoe, agine an igarmar narmasa neggwebur eba daega’. Degsoggu Moisés gannar yarbirse naggwisbali. Yar birgi 40 días gudigusa, aa gine osedosdae geb oiboardabali.

Babdummadi igarmar buggidar e neggweburga mesisa. Moisés we igarmar narmade. Babdummad anba Moisésga aggwa maddargwagwad gwabogwad ugdebali. Agine Babdummad e neggweburga 10 mergu igarmar narmasa. We igarmala bilemala Igar Sogambegid.

We Igar Soganbegidi igar nue abelemaladi. Auggine anba deyob gumarmoga buggidar igarmar bamalad Babdummad Israel dulemarga ugsadi. Soggwen we igala soge: ‘Be Babdummad Jehová be sabguo bela be gwagegi, bela be binsaedgi, bela be sangi, bela be ganguedgi’. Geb baiddina soge: ‘Dule baid be sabguo na be sabgueyob’. Babdummad Massi, Jesucristo, sogsa we igar sogbogwad Babdummad na e neggwebur Israelga ugsadi, bur igar dummaganye. Sorbali anmar bur bule durdaggoe Babdummad Massisig geb e ibmar odurdasad siggi.