KALO fila ɲɔgɔn u bɔnin kɔ Misira, Israɛldenw sera Sinayi kulu kɔrɔ, o min be weele fana ko Orɛbu kulu. O yɔrɔ kelen lo la, Musa tun ye Jehova kumakan mɛn ka bɔ yiritunin manatɔ la. Jama sigira yen ka wagati dɔɔni kɛ.

Ka jama to a be kɔnɔni kɛra kulu jukɔrɔ, Musa yɛlɛla ka taga kulu kan. Kulu sanfɛ, Jehova y’a fɔ Musa ye ko ale b’a fɛ Israɛldenw ka ale kaan minɛ ani u ka kɛ ale ka mɔgɔ ɲɛnatɔmɔninw ye. Musa jigira ka na tuma min na, a y’o kuma fɔ Israɛldenw ye. Jama y’a fɔ ko u bena Jehova kaan minɛ sabu u b’a fɛ ka kɛ a ka mɔgɔw ye.

O la sa, Jehova ye kabako dɔ kɛ. A y’a kɛ kulu kuncɛ faan bɛɛ kɛra sisi ye ani saan pɛrɛnna fanga la. A fana kumana jama fɛ ko: ‘Ne ye Jehova aw ka Ala ye, min ye aw labɔ Misira jamana na.’ Ani, a ye cikan nin di ko: ‘Aw kana ala wɛrɛw bato fɔɔ ne kelenpe.’

Ala ye cikan, walima sariya kɔnɔntɔn wɛrɛ di Israɛldenw ma. Siranyaba ye jama minɛ. U y’a fɔ Musa ye ko: ‘Ele yɛrɛ ka kuma an fɛ, sabu an be siranna ko ni Ala yɛrɛ kumana an fɛ, an bena sa.’

O kɔ, Jehova y’a fɔ Musa ye ko: ‘Yɛlɛ ka na ne fɛ kulu kan. Ne bena walaka kabakurulaman fila di i ma ne ye sariyaw sɛbɛ minw kan. Jama ka kan k’o sariyaw lo sira tagama.’ Musa yɛlɛla tugun kulu kan ani a tora yen fɔɔ tile 40 ani suu 40.

Sariya caaman caaman tun be Ala fɛ k’u di a ka mɔgɔw ma. Musa y’o sariyaw sɛbɛ. Ala ye walaka kabakurulaman fila fana di Musa ma. Ala tun ye sariya 10 minw kofɔ a ka mɔgɔw ye, ale yɛrɛ y’u sɛbɛ o walakaw kan. O sariyaw be weele ko Cikan Tan.

Cikan Tan nunu ye sariya kɔrɔtaninw ye. Nka Ala ye sariya caaman wɛrɛ minw di Israɛldenw ma, olu fana kɔrɔtanin lo. O sariya dɔ b’a fɔ ko: ‘I ka kan ka Jehova i ka Ala kanu n’i dusu bɛɛ ye, n’i hakili bɛɛ ye, n’i niin bɛɛ ye, an’i fanga bɛɛ ye.’ Dɔ wɛrɛ b’a fɔ ko: ‘I ka kan k’i mɔgɔɲɔgɔn kanu i n’a fɔ i yɛrɛ.’ Ala Dencɛ Yezu Krista y’a fɔ ko Jehova ye sariya minw di a ka jama Israɛl ma, o sariya fila nunu lo ye u bɛɛ la belebelebaw ye. An bena na koo caaman kalan Ala Dencɛ n’a ka kalanw koo la kɔfɛ.