Jehová ja kukwei biani
Kukwe kira 35
Jehová ja kukwei biani
NITRE Israel kä mikaninkä Egipto ye bitikäre kä nikani krire sö krobu ta angwane, namani ngutuä Sinaí yekänti, kädekata Horeb arato. Yete Ngöbökwe blitabare Moisebe kri chi jutra ngitiekä te. Kä braibe te, nitre namani nünentubu kä yekänti.
Nitre namani ngösöri, Moisés nikani ngutuä yebiti. Yete, Jehová niebare Moisés ie Niara tö namani nitre Israel tuai ja mike täte aune rabadre juta kwe. Moisés nükaninta ngösöri ngwane, Jehová kukwe niebare ye niebare kwe nitre Israel ie. Nitre Israel tö ja mikai juta Jehovakwe, yebätä kukwe mikai täte kwe niebare kwetre.
Jehovakwe jondron ñan tuabare nuainbare mada. Ngutuä yete ngübü mikani nen kunkwäre kwe, aune unsulin mikani näkäin kwe ngö namani dite. Arato niebare kwe juta ye ie: ‘Ti Jehová Ngöbö munkwe abokän käkwe mun mikani kwäre kä Egipto känti.’ Biti niebare kwe ietre: ‘Munkwe ti aibe mika Ngöböre jai.’
Ngöbökwe kukwe keta ökän mada biani nuaindre nitre Israel ie. Nitre yebätä kä jürä namani krubäte. Niebare kwetre Moisés ie: ‘Blite nunbe ñobätä ñan aune Ngöbökwe blitadre nunbe aune nun raba krüte jürä nunbätä.’
Ye bitikäre, Jehová niebare Moisés ie: ‘Jakwre ngutuäbiti nete. Tibike jä kwatare kubu bien mäi, känti tikwe kukwe tikani abokän juta Israel käkwe mikadre täte ie ti tö.’ Yebätä Moisés nikaninta bobukäre ngutuäbiti. Köbö gre ketebu te dibire aune rare namani yete.
Kukwe keta kabre krubäte Ngöbökwe biani juta kwe ie. Moisekwe tikani. Arato Ngöbökwe jä kwatare kubu biani Moisés ie. Jä yebätä, kukwe keta jätä Ngöbökwe biani juta kwe ie, ye tikani akwle kwe. Kädekata Kukwe keta Jätä.
Kukwe keta Jätä ye kukwe ütiäte krubäte. Akwa ye kukwe keta kabre mada biani Ngöbökwe arato nitre Israel ie. Keteiti tä niere: ‘Mäkwe Jehová Ngöbö mäkwe taredre ja brukwä tätebiti, töi tätebiti, ja nire tätebiti aune ja di tätebiti.’ Mada keteiti abokän: ‘Mäkwe ni mada taredre mätä ja tarere ye erere.’ Ngöbö monsoi, Jesukristo käkwe niebare, kukwe ketebu Ngöbökwe biani juta Israel ie ne abokän bäri ütiäte. Biti nikwe ja tötikai bäri Ngöbö Monsoi yebätä bätä kukwe driebare kwe yebätä.
Éxodo 19:1-25; 20:1-21; 24:12-18; 31:18; Deuteronomio 6:4-6; Levítico 19:18; Mateo 22:36-40.
