Yahwa yefka-d leqwanen
TAQSIṬ TIS 35
Yahwa yefka-d leqwanen
MI ƐEDDAN wazal n sin wagguren segmi i d-ffɣen si Maṣer, At Isṛayil ṛuḥen ɣer wedrar n Sinay yeţţusemman diɣen Ḥurib. Deg wemḍiq-nni swaswa i d-immeslay Yahwa i Musa seg inijel ideg i tecɛel tmes. Dinna i sbedden wat Isṛayil iqiḍunen-nsen kra n lweqt.
Agdud yeţṛaǧu ukessar, ma d Musa yuli ɣer wedrar. Mi gewweḍ Musa ɣer yixef n wedrar, Yahwa yenna-yas belli yebɣa a s-aɣen awal wat Isṛayil. Yebɣa diɣen a ten-yerr d agdud-is ger yegduden meṛṛa. Mi d-iṣubb Musa seg wedrar, ixebbeṛ At Isṛayil ɣef wayen i s-d-yenna Ṛebbi. Agdud yeqbel ad yaɣ awal i Yahwa axaṭer yebɣa ad yuɣal d agdud-is.
Tura Yahwa ad ixdem yiwet n lḥaǧa yessewhamen. Yessker abbu (dduxxan) ɣef yixef n wedrar yerna yesseṛɛed igenni. Yenna i wegdud: ‘Nekk d Yahwa, Ṛebbi-nwen, win i kkun-id-issufɣen si tmurt n Maṣer.’ Mbeɛd yumeṛ-asen: ‘Ur ilaq ara aţ-ţɛebdem iṛebbiten nniḍen siwa nekkini.’
Ṛebbi yefka i wat Isṛayil tesɛa n lumuṛ neɣ n leqwanen nniḍen. Agdud ikcem-it lxuf d ameqran. Dɣa yenna i Musa: ‘Hdeṛ-aɣ-d kečč axaṭer nugad a nemmet ma yehdeṛ-ed Ṛebbi yid-nneɣ.’
Umbeɛd, Yahwa yenna i Musa: ‘Ali-d ɣur-i ɣer wedrar. A k-d-fkeɣ snat n teblaḍin n weẓru anda uriɣ ɛecṛa leqwanen i bɣiɣ ad yetbeɛ wegdud.’ Dɣa Musa yuli tikkelt nniḍen ɣer wedrar. Iqqim dinna 40 n wussan d 40 n wuḍan.
Ṛebbi yesɛa aṭas n leqwanen ara yefk i wegdud-is. Issexdem Musa akken a ten-yaru. Ṛebbi yefka daɣen i Musa snat-nni n teblaḍin n weẓru iɣef yura s yiman-is ɛecṛa n leqwanen i gmudd i wegdud. Ţţusemman Ɛecṛa n Lumuṛ.
Ɛecṛa n Lumuṛ-agi, d leqwanen yesɛan azal ameqran. Lameɛna aṭas n leqwanen nniḍen i gefka Ṛebbi i wat Isṛayil. Yiwen seg-sen yeqqar: ‘Ilaq aţ-ţḥemmleḍ Yahwa Ṛebbi-inek s wul-ik meṛṛa, s ixemmimen-ik meṛṛa, s teṛwiḥt-ik meṛṛa ţ-ţezmert-ik meṛṛa.’ Lqanun nniḍen yeqqar: ‘Ilaq aţ-ţḥemmleḍ lɣir-ik am yiman-ik.’ Mmi-s n Ṛebbi, Ɛisa Lmasiḥ, yenna-d belli sin leqwanen-agi ugaren akk wid yefka Yahwa i wegdud-is, At Isṛayil. Ɣer zdat a nwali aṭas n leḥwayeǧ ɣef mmi-s n Ṛebbi d wayen yesɣer.
Tuffɣa 19:1-25; 20:1-21; 24:12-18; 31:18; Asmekti 6:4-6; At Lewwi 19:18; Matta 22:36-40.
